यस्तो छ नेकपाको केन्द्रीय कमिटी बैठकको कार्यसूची
काठमाडौं । नेपाल कम्युनिष्ट पार्टीले बुधबारदेखि बस्ने केन्द्रीय कमिटी बैठकको कार्यसूची तय गरेको छ । प्रधानमन्त्री निवास बालुवाटारमा मंगलबार साँझ बसेको सचिवालय बैठकले केन्द्रीय कमिटी बैठकको कार्यसूची तय गरेको नेकपाका प्रवक्ता नारायणकाजी श्रेष्ठले जानकारी दिए ।
उनका अनुसार बैठकमा पार्टी अध्यक्ष एवं प्रधानमन्त्री केपी शर्मा ओलीको उद्घाटन मन्तव्यपछि अर्का अध्यक्ष पुष्पकमल दाहाल ‘प्रचण्ड’ले पार्टीको राजनीतिक प्रतिवेदन प्रस्तुत गर्नेछन् ।
त्यसैगरी बैठकमा महासचिव विष्णुप्रसाद पौडेलले साङ्गठनिक प्रतिवेदन तथा विधान संशोधन प्रस्ताव प्रस्तुत गर्ने र सातै प्रदेशका अध्यक्षहरूले आ–आफ्नो प्रदेश कमिटिको साङ्गठनिक प्रतिवेदन पेश गर्ने कार्यक्रम तय भएको प्रवक्ता श्रेष्ठले जानकारी दिए । यसैगरी सममायिक प्रस्ताव र विविध विषयसमेत बैठकमा प्रस्तुत हुने बताइएको छ ।
प्रवक्ता श्रेष्ठका अनुसार समसामयिक प्रस्ताव अहिलेको राजनीतिक गतिविधिमा केन्द्रीत हुने छ । विसं २०७७ चैतको मसान्तसम्म पार्टीको एकता महाधिवेशन गर्ने स्थायी कमिटीले पेश गरेको प्रस्ताव केन्द्रीय कमिटीमा रहने उनले जानकारी दिए ।
बैठक यही माघ २० गतेसम्म राष्ट्रिय सभागृहमा बस्न लागेको हो । पार्टी एकता भएको डेढ वर्षपछि बैठक पहिलो पटक कार्यसूचीसहित बस्न लागेको हो ।
नेपाल कम्युनिस्ट पार्टी (नेकपा) केन्द्रीय कमिटी बैठकका एजेण्डाहरू
१. सहिदहरूप्रति श्रद्धाञ्जलि,
२. बैठककाे उद्घाटन र उद्घाटन मन्तव्य – सम्माननीय प्रधानमन्त्री तथा पार्टी अध्यक्ष कमरेड केपी शर्मा अाेली,
३. राजनीतिक प्रतिवेदन प्रस्तुति – अध्यक्षद्वयका तर्फबाट कार्यकारी अध्यक्ष कमरेड पुषपकमल दाहाल”प्रचण्ड”,
४. संगठनात्मक प्रतिवेदन तथा विधान संशाेधन प्रस्ताव प्रस्तुति – महासचिव विष्णुप्रसाद पाैडेल,
५. सातवटै प्रदेशका अध्यक्षहरूद्वारा संगठनातमक कामकाे रिपोर्टिङ,
६. समसामयिक प्रस्तावहरूकाे प्रस्तुति र
७. विविध ।
