सभामुख चयनका विषयमा ओली र प्रचण्डबीच छलफल
काठमाडौं । सभामुख चयनको विषयमा सत्तारुढ नेकपा अध्यक्षद्वय प्रधानमन्त्री केपी शर्मा ओली र पुष्पकमल दाहाल ‘प्रचण्ड’ छलफलमा जुटेका छन् ।
प्रधानमन्त्री एवं पार्टी अध्यक्ष ओलीलाई भेट्न अर्का अध्यक्ष प्रचण्ड प्रधानमन्त्री निवास बालुवाटार पुगेका थिए । नेकपाले सभामुखको उम्मेदवार टुंगो लगाउन नसक्दा प्रतिनिधिसभाको बैठक बस्न सकेको छैन । तीन पटक सूचना टाँसेर स्थगित गरिएको संसद् बैठक माघ ६ गतेका लागि बोलाइएको छ । नेकपामा कसलाई सभामुख बनाउने भन्ने विषयमा विवाद छ ।
प्रधानमन्त्री ओलीले पूर्वसभामुख सुभास नेम्वाङलाई र अध्यक्ष प्रचण्डले अग्नी सापकोटालाई सभामुख बनाउन खोजेका बताइएको छ । राष्ट्रपति विद्यादेवी भण्डारी भने उपसभामुख डा.शिवमाया तुम्बाहाङफेलाई सभामुख बनाउनु पर्ने पक्षमा रहेको बताइएको छ ।
यस अघि नेकपा सचिवालय बैठकले उपसभामुख तुम्बाहाङफेलाई राजीनामा गर्न निर्देशन दिने निर्णय गरेको थियो। तर उनले सभामुखको उम्मेदवार चयन नहुँदासम्न राजीनामा नदिने अडान लिएकी छन् ।
