सरकारलाई एमसिसी परियोजना स्वीकार गर्न विज्ञको सुझाव
काठमाडौं । विज्ञहरुले मिलेनियम च्यालेञ्ज कर्पोरेशन (एमसीसी) परियोजना लागू गरी लाभ लिन कुनै शंका गर्नु नपर्ने बताएका छन् । शुक्रबार काठमाडौंमा भएको छलफलमा संसदको अर्थ समितिका सभापति कृष्ण दाहालले एमसीसी परियोजनाबाट लाभ लिन कुनै शंका गर्नु नपर्ने बताए ।
एउटा सम्झौताकै कारण अमेरिकी सेना नेपाल आएर कब्जा गर्ने परिस्थिति सिर्जना हुन्छ भन्ने कमजोर मानसिकता सामाजिक सञ्जालमा देखिएको उनको भनाई थियो ।
‘हाम्रो राष्ट्र त्यति कमजोर भएको जस्तो लाग्दैन । एउटा सम्झौताले ह्वारह्वारती सेनाहरु आएर कब्जा गर्ने परिस्थिति हुन्छ भन्या जस्ता कुराहरु सामाजिक सञ्जालमा देखिन्छ । अनि त्यस्तो छलफलले राष्ट्र कमजोर हुने की बलियो ?’, उनले भने, ‘विभाजित मानसिकता लिएर होइन । हाम्रो राष्ट्रको हात माथि पर्नुपर्छ र परेको छ भन्ने भावनाको विकास हुनुपर्छ ।’
पूर्वराजदुत डा. शंकर शर्माले लिइरहेको र लिने सहयोग नेपालको पक्षमा छ भने केही गाह्रो नहुने बताए । अमेरिकाले आर्थिक सहयोग पनि गर्ने, सुरक्षामा पनि सहयोग गर्ने, सरकारलाई पनि सहयोग गर्ने भनेपछि इण्डो प्यासिफिकको रिपोर्ट उल्लेख गरेपनि नेपालले सहि नै नगरेको विषयमा जवरजस्ती गर्न नआउने तर्क उनले गरे ।
विवेकशील नेपाली दलका प्रवक्ता डा. सूर्यराज आचार्यले नेपालीहरुको अकर्मन्यताले एमसिसीको विषयमा विवाद उत्पन्न भएको बताए । नेपालले आफ्नो राष्ट्रिय स्वार्थ र विकासका नीतिहरु स्पष्ट गर्न सकेमा एमसिसीमा जस्तो अवरोध पुनः नदोहोरिने बताए ।