सरकारले भारतसँग सीमा विवादको विषयलाई स्पष्टसँग राख्न नसकेको चित्रबहादुर केसीको आरोप
काठमाडौं । नेपाली कांग्रेसका नेता अर्जुननरसिंह केसीले सरकारले सपना बाँड्ने तर काम नगर्ने प्रवृतिलाई प्रोत्साहन गरेको आरोप लगाएका छन् ।
काठमाडौंमा शनिबार आयोजित साक्षात्कारमा नेता केसीले सरकारले भ्रष्टाचारलाई बढ्वा दिएको आरोप लगाएका हुन् । उनले आग्रह पूर्वाग्रहलाई प्रोत्साहन दिएकाले ३३ केजी सुन काण्ड, वाइडबडीमा अनियमितता, एनसेल काण्ड, नेपाल टेलिकमको फोरजीमा भएको अनियमितता तथा वालुवाटार जग्गा काण्डका दोषीलाई कारबाही गर्न नसकेको बताए ।
उनले सरकार आफू कमजोर भई काम गर्न नसकेको दोष कर्मचारी प्रशासनलाई लगाएको आरोप समेत लगाए । राष्ट्रिय जनमोर्चाका अध्यक्ष चित्रबहादुर केसीले नेपालले भारतसँग सीमा विवादको विषयलाई स्पष्टसँग राख्न नसकेको बताए ।
उनले आवश्यक परे नेपाल सीमा विवादको मुद्दालाई लिएर अन्तर्राष्ट्रिय अदालतमा पनि जानपछि पर्न नहुने बताए । नेपाल कम्युनिष्ट पार्टी (नेकपा)का नेता टोपबहादुर रायमाझीले सरकार राष्ट्रियता, सुशासन, विकास र समृद्धिको यात्रामा अघि बढेको बताए ।
उनले जुन स्तरमा काम हुनुपर्ने थियो त्यो स्तरमा नभएपनि प्रतिपक्षी दलले लगाएको आरोपमा सत्यता नभएको बताए ।
