संवैधानिक परिषद्सम्बन्धी अध्यादेश ल्याउन लागेको भन्दै कांग्रेसका शीर्ष नेता सरकारसँग रुष्ट
पोखरा । नेपाली काङ्ग्रेसका सभापति शेरबहादुर देउवाले सरकारले न्यायालय, सञ्चारलगायत क्षेत्रका अधिकार एकपछि अर्को गर्दै खोस्दै गएको आरोप लगाएका छन् ।
नेपाल डेमोक्रयाटिक लयर्स एशोसिएशनको वार्षिक साधारणसभाको शुक्रबार पोखरामा उद्घाटन गर्दै सभापति देउवाले सरकारले संवैधानिक परिषद्लाई पनि कठपुतली बनाउन खोजेको आरोप लगाएका हुन् ।
उनले कास्कीमा लामो समय योगदान गरेका नेता खेमराज पौडेललाई जिताउन पनि सबैसँग आग्रह गरे ।
कांग्रेस वरिष्ठ नेता रामचन्द्र पौडेलले संवैधानिक आयोगमा नियन्त्रण गर्ने सोचका साथ संवैधानिक परिषद्सम्बन्धी अध्यादेश ल्याउन लागिएको आरोप लगाउँदै यसलाई राष्ट्रपतिले जारी गर्न नहुने बताए ।
महामन्त्री शशाङ्क कोइरालाले आसन्न उपनिर्वाचन जनमतसङ्ग्रहजस्तै भएको भन्दै जनताको मन जित्दै पार्टीका उम्मेदवार विजयी बनाउन पार्टीका नेता तथा कार्यकर्तालाई आग्रह गरे ।
