प्रचण्डलाई कार्यकारी अध्यक्षको जिम्मेवारी, ओली पाँच वर्ष प्रधानमन्त्री हुने
काठमाडौँ । नेकपाको सचिवालय बैठकले केपी शर्मा ओलीलाई पाँच वर्ष प्रधानमन्त्री रहने निर्णय गरेको छ । बुधबार बालुवाटारमा बसेको सचिवालय बैठकले यस्तो निर्णय गरेको हो ।
अध्यक्ष पुष्पकमल दाहाललाई भने पार्टीको कार्यकारी अधिकार दिइने बैठकले निर्णय गरेको छ । यसअघि केपी शर्मा ओली नै कार्यकारी अध्यक्ष भूमिका निर्वाह गरेका थिए । तर पनि बैठकको अध्यक्षता संयुक्त गर्ने गरिएको थियो ।
कार्यकारी अधिकारसहितको पार्टीको नेतृत्व प्रचण्डले गर्ने कुरामा सहमति जुटेको प्रवक्ता नारायणकाजी श्रेष्ठले जानकारी दिए । तर दुवै नेताको वरीयता भने बराबर हुनेछ ।
पार्टी र सरकार सञ्चालन दुवै नेताको सहमति, सल्लाह र समझदारीमा हुनेछ । अब प्रधानमन्त्री केपी शर्मा ओली सरकारको काममा केन्द्रित हुने र प्रचण्ड कार्यकारी अधिकारसहित पार्टी काममा केन्द्रित हुने र बैठकको अध्यक्षता संयुक्त गर्ने र सञ्चालन अध्यक्ष प्रचण्डले गर्ने विषयमा समझदारी जुटेको उनले बताए ।
