‘प्रधानमन्त्री ज्यू, भारतीय पक्षले मिचेको भूमि फिर्ता नलिए नेपाली जनताले माफी दिँदैनन् नि !’
काठमाडौं । नेकपा मालेका महासचिव सिपी मैनालीले भारत सरकारबाट नेपाली भूमि फिर्ता नलिए प्रधानमन्त्री केपी ओलीलाई नेपाली जनताले माफी नदिने चेतावनी दिएका छन् ।
भारतीय पक्षले सीमा मिचेको विरोधमा आइतबार काठमाडौंमा आयोजित विरोध कार्यक्रममा महासचिव मैनालीले कालापानीलगायतका नेपाली भूमि भारतले मिचेको प्रमाण सरकारसँग रहेको उल्लेख गर्दै ती समस्या समाधान गर्न प्रधानमन्त्री ओलीलाई गम्भर भएर लाग्न आग्रह गरे ।
उनले दुई मुलुकबीचको सीमा समस्या समाधान अब पनि नगरे नेपाली जनताले ओली नेतृत्वको वर्तमान सरकारलाई पनि अस्विकार गर्ने चेतावनी दिए ।
महासचिव मैनालीले विज्ञहरुले पटक पटक दिएको सुझावलाई ध्यानमा राखेर सरकारले भारतसँगको सीमा समस्या समाधान गर्नुपर्ने बताए । काठमाडौंको प्रदर्शनीमार्गबाट सुरु भएको विरोध प्रदर्शन पुतलीसडक, बागबजार हुँदै रत्नपार्कमा पुगेर कोण सभामा परिणत भएको थियो ।
