मसँग भारत सरकारले जारी गरेको सवारी चालक अनुमतिपत्र छ, नागरिकता होइनः देवेन्द्रराज कँडेल
काठमाडौं । नेपाली कांग्रेसका केन्द्रीय सदस्य देवेन्द्रराज कँडेलले समाचारहरुमा आए जस्तो आफ्नो भारतीय नागरिकता नभएको बताएका छन् । बुधबार पार्टी कार्यालय सानेपामा पत्रकार सम्मेलन गरी सांसद कँडेलले भारतीय नागरिकता भएको भनि आएको समाचारको खण्डन गरेका हुन् ।
पत्रकार सम्मेलनमा कँडेलले आफ्नो नाममा भारतीय भूमिमा कुनै जमिन वा मतदाता परिचयपत्र भएको प्रमाणित गर्न चुनौती दिएका छन् ।
कँडेलले नवरलपरासीको सीमावर्ती भारतीय सहरमा आफ्नी हजुरआमाले स्थापना गरेको राधाकुमारी इन्टर कलेजको सञ्चालक समितिको चुनावबाहेक कतै पनि मतदान नगरेको दाबी गरे ।
पत्रकार सम्मेलनमा नेता कँडेलले आफूसँग भारत सरकारले जारी गरेको सवारी चालक अनुमतिपत्र रहेको बताए । उनले भएको सवारी चालक अनुमति पत्र भारतमा अध्ययन गरेको समयमा शैक्षिक योग्यताको प्रमाणपत्रका आधारमा बनाएको स्पष्ट पारे ।
कँडेलले पत्रकार सम्मेलनमा आफ्नी हजुरआमाले खोलेको क्याम्पसको अध्यक्ष भएकै कारण भारतको उच्च अदालतमा आफूविरुद्ध नेपाली नागरिकले भारतीय संघसंस्थामा अध्यक्ष हुन नपाउने भनेर मुद्दा चलिरहेको पनि बताए ।