सत्यनिरूपण र बेपत्ता छानविन आयोगमा सहमति खोज्न सत्तापक्ष र प्रतिपक्ष दलका शीर्ष नेताबीच छलफल
काठमाडौं । सत्यनिरूपण तथा मेलमिलाप आयोग र बेपत्ता खोजबिन आयोग गठनबारेमा सत्तापक्ष र प्रतिपक्षका तीन ठूला नेताबीच छलफल भएको छ ।
प्रधानमन्त्री निवास बालुवाटारमा सत्तापक्ष र प्रतिपक्षबीच छलफल भएको हो । सत्यनिरूपण तथा मेलमिलाप आयोग, बेपत्ता छानबिन आयोग नेतृत्व छान्ने र समसामयिक राजनीतिक घटनाक्रमबारे प्रधानमन्त्री केपी शर्मा ओली, नेकपाका अध्यक्ष पुष्पकमल दाहाल प्रचण्ड र प्रमुख प्रतिपक्षी दल नेपाली कांग्रेसका सभापति शेरबहादुर देउवाबीच सोमबार छलफल भएको हो ।
भेटमा द्वन्द्वकालीन मुद्दाहरूलाई छिटो टुंग्याउने विषयमा कुराकानी भएको बैठकमा सहभागी नेकपा नेता सुवास नेम्वाङले जानकारी दिए । यी दुवै आयोगमा पदाधिकारी नियुक्तिका लागि यसअघि नै संयोजक समिति गठन गरिएको छ । समितिले अझैसम्म कसलाई नियुक्त गर्ने भन्ने टुंगो लगाउन सकेको छैन ।
