फेरियो देउवाको बोली, अलमविरुद्ध ’षड्यन्त्र भयो’ भनेर नभनेको दाबी
काठमाडौं । नेपाली कांग्रेसका सभापति शेरबहादुर देउवाले मोहम्मद आफताव आलमबारेको विवादस्पत अभिव्यक्तिपछि बोली फेरेका छन्। उनले शनिबार विज्ञप्ति जारी गर्दै आफूले मोहम्मद आफताव आलमको मुद्दामा ’षड्यन्त्र भयो’ नभनेको बताएका छन् ।
शुक्रबार पार्टी केन्द्रीय नीति, अनुसन्धान तथा प्रशिक्षण प्रतिष्ठानले भक्तपुरमा गरेको प्रशिक्षण कार्यक्रमा व्यक्त गरेको धारणाप्रति पार्टीभित्र र बाहिरबाट चर्को आलोचना भएपछि शनिबार विज्ञप्ती जारी गर्दै उनले यस्तो बताएका हुन् ।
सभापति देउवाले आफूले त्यस्तो भन्न नखोजेको दाबी गरेका छन् । उनले कुनै पनि गम्भीर मुद्दामा प्रकृयागत ढिलासुस्ती हुँदा त्यसले निर्दोष सावित हुने या दोषी ठहर हुने सत्यतथ्य अन्वेषण गर्ने कार्यमा बाधा पुग्ने विषयतर्फ मात्रै संकेत गरेको दाबी गरेका छन् ।
‘१२ वर्ष पुरानो मुद्दामा मैले यही संकेत गरेको हुँ। तर, कानुनी राज्यमा विश्वास गर्ने नेपाली कांग्रेस कोहीमाथि पनि जरुरी अनुसन्धानको विपक्षमा उभिन सक्दैन’ देउवाले जारी विज्ञप्तिमा भनिएको छ ।
