बडादशैंको दशौं दिन आज विजया दशमी, टीकाको उत्तम साइत बिहान १० बजेर ३५ मिनेटमा
आज आश्विन शुक्ल दशमी अर्थात् विजयादशमी ।
नेपालीहरुले आजको दिन आफ्ना मान्यजन तथा अग्रज अभिभावकबाट दुर्गा भवानीको प्रसादस्वरुप टीका, जमरा र आशिर्वाद ग्रहण गरी देशभर हर्षोल्लासका साथ विजयादशमी मनाउँदै छन् । आज बडादसैंको मुख्य दिन भए पनि टीका लगाउने क्रम कोजाग्रत पूर्णिमाको दिनसम्म नै रहन्छ ।
देशका केही भेगमा भने आजको दिनमात्र टीका लगाउने चलन पनि छ। नेपाल पञ्चाङ्ग निर्णायक समितका अनुसार यो वर्षको दसैंको टीकाको उत्तम साइत बिहान १० बजेर ३५ मिनटेमा रहेको छ । ८ बजेर ४५ मिनेटमा देवी विर्सजन गरिएको छ ।
असत्यमाथि सत्य र आसुरी शक्तिमाथि दैवी शक्तिको विजयका रुपमा विजयादशमी मान्ने गरेको किम्दन्ति रहेको छ । दसैँमा नवीन वस्त्र धारण गर्ने तथा आफ्नो क्षमता अनुसार मिठो कुरा खाने, घर आँगन तथा वस्ती सरसफाइ तथा रङ्गरोगन गर्ने प्रचलन पनि छ ।
दसैँ पर्वले काम, क्रोध, लोभ, मोह, अहङ्कार, आलस्य, हिंसा र चोरी आदि त्याग्ने सत्प्रेरणा दिने विश्वास गरिन्छ ।
