दुबईमा मिनिबस दुर्घटनामा परी ६ नेपालीको मृत्यु
काठमाडौं । दुबईमा सोमबार बिहान भएको सवारी दुर्घटनामा ६ जना नेपाली सहित आठ जनाको मृत्यु भएको छ भने अन्य ६ जना गम्भीर घाइते भएका छन् ।
दुबई प्रहरीले दिएको प्रारम्भिक जानकारी अनुसार सोमबार बिहान मोहम्मद बिन जायद रोडमा मिनीबस दुर्घटना हुँदा ती नेपालीको ज्यान गएको गल्फ न्यूजले उल्लेख गरेको छ ।
तर मृतक नेपालीहरूको पहिचान खुलिसकेको छैन । दुर्घटनाका क्रममा ट्रकसँग ठोक्किएको मिनीबस पुरै क्षतिग्रस्त भएको छ। मृतक र घाइतेहरूलाई उद्धार गरेर स्थानीय रसिद अस्पताल लगिएको थियो ।
दुर्घटनामा परेको मिनीबसले १३ जना यात्रु बोकेको थियो । घाइतेहरूको रशिद अस्पतालको आकस्मिक कक्षमा राखेर उपचार भइरहेको छ । अन्य मृतकमा पाकिस्तानी र भारतीय नागरिक रहेका छन्। घाइते हुनेहरूमा एकजना बंगालदेशी र ५ जना भारतीय नागरिक रहेका छन् । दुर्घटनामा मिनीबस चालकको पनि ज्यान गएको छ ।
