तीन सय शय्यासहित सेवा विस्तार गर्दै नेपाल एपीएफ अस्पताल 

काठमाडौं। सशस्त्र प्रहरी बल नेपालमा कार्यरत बहालवाला तथा पूर्व सशस्त्र प्रहरी कर्मचारी तथा उनीहरूका आश्रित परिवार र सर्वसाधारण नागरिकहरूको सेवा सुविधाको लागि नेपाल एपीएफ अस्पतालले तीन सय शय्यासहितको सेवा विस्तार गरेको छ । मेडिकल कलेजको लागि आधारभूत संरचनाहरू निर्माण कार्य जारी छ ।

अस्पतालको स्तरवृद्धिको अवधारणा अनुरूप पछिल्लो ३ वर्षमा दुई वटा नयाँ माड्युलर अप्रेसन थियटरको निर्माण गर्नुकासाथै सहवीर थापा अन्कोलोजी युनिटको समेत स्थापना गरी संचालनमा ल्याएको छ ।

सो युनिट स्थापनासँगै क्यान्सर रोगको उपचार सेवा समेत शुरु भएको छ । त्यस्तै इन्ट्रानेट तथा इन्टरनेट जडित सशस्त्र प्रहरी बल नेपालको सम्पूर्ण कार्यालयहरूमा टेलिमेडिसिन सेवा समेत सञ्चालन गर्दै आएको छ । जसका कारण अस्पतालसम्म आउन नसक्ने बिरामीले सजिलै स्वास्थ्य सम्बन्धी जानकारी लिन सकिने छ ।

स्वास्थ्य तथा जनसंख्या मन्त्रालयबाट नेपाल एपीएफ अस्पताललाई तीन सय शय्या क्षमताको अस्पताल संचालनको लागि २०८१ असोजमा इजाजत पत्र प्राप्त भएपछि सञ्चालनमा ल्याइएको हो ।

त्यस्तै नेपाल सरकार (सचिवस्तर) को मिति २०८० पौष २२ गतेको निर्णयअनुसार नेपाल एपीएफ अस्पतालले विपन्न नागरिक औषधी उपचार कार्यक्रम सञ्चालन निर्देशिका बमोजिम सर्वसाधारणहरूको लागि समेत हेमोडायलेसिस सेवा सञ्चालनमा ल्याएको हो ।