मुलुकभर एकैपटक ३९६ आधारभूत अस्पताल निर्माणको काम सुरु
काठमाडौं । सरकारले मुलुकभर एकैपटक ३९६ आधारभूत अस्पताल निर्माण कार्य शुरु गरेको छ । सात प्रदेशका ७५३ स्थानीय तहलाई समेटेर स्वास्थ्य तथा जनसंख्या मन्त्रालयले ५, १० र १५ शैय्याका ३९६ आधारभूत अस्पताल निर्माण शुरु गरेको हो ।
अस्पताल निर्माणका क्रममा सोमबार ललितपुरको गोदावरी नगरपालीका अन्तर्गत बज्रवाराहीमा १५ शैयाको अस्पताल निर्माणको शिलान्यास गरिएको छ ।
अर्थमन्त्री विष्णु पौडेलले बज्रवाराही चापागाउँ अस्पतालको शिलान्यास गरेका हुन् । सो क्रममा मन्त्री पौडेलले जनताको आधारभूत स्वास्थ्य अधिकार प्रत्याभूत गर्नका लागि देशभर नै अस्पताल निर्माण गर्न लागिएको बताए । उनले स्थानीय तहको माग र आवश्यकताका आधारमा अस्पताल निर्माण शुरु गरिएको जानकारी दिए ।
मन्त्री पौडेलले देशभर निर्माण हुने अस्पतालमा बजेट अभाव हुन नदिने पनि स्पष्ट पारे । सोमबार सम्ममा ३ सय भन्दा बढी भवनको शिलान्यास भइसकेको छ । अन्य स्थानमा छिटै प्राविधिक समस्या समाधान गर्दै अस्पताल निर्माण सुरु गरिने जानकारी उनले दिए ।
त्यस्तै मन्त्री पौडेलले वर्तमान सरकारलाई जनमत प्राप्त सरकार भएकाले पाँच बर्षसम्म ढुक्कले काम गर्ने दावी गरे । जनताको आधारभूत आवश्यकतालाई परिपूर्ति गर्दै मुलुकलाई बिकासको बाटोमा लैजाने काम वर्तमान सरकारले गरेको उनले बताए ।
सरकारको योजना अनुसार प्रदेश १ मा ८६, प्रदेश २ मा ५३, प्रदेश ३ मा ५१, प्रदेश ४ मा ५३, प्रदेश ५ मा ५७, प्रदेश ६ मा ४२, र प्रदेश ७ मा ५४ रहनेछन् । यही आर्थिक वषभित्र सम्पन्न गर्ने लक्ष्य राखिएको अस्पताल भवन निर्माणको कुल बजेट ५८ अर्ब छ ।
