देवदह मेडिकल कलेजमा उपचारका क्रममा मृत्यु भएका पुरुषमा कोरोना संक्रमण पुष्टि

बुटवल । रुपन्देहीको देवदहका एक मृतकमा कोरोना संक्रमण पुष्टि भएको छ । देवदह नगरपालिका–९, भलुहीमा रहेको देवदह मेडिकल कलेजमा उपचार गराइरहेका एक बिरामीको बुधवार मृत्यु भएको थियो । देवदह नगरपालिका–३, शिसपुर निवासी ७० बर्षीय पुरुषको उपचारका क्रममा मृत्यु भएपछि परीक्षण गराउँदा कोरोना पोजेटिभ देखिएको देवदह नगर स्वास्थ्य शाखाले जनाएको छ ।

उनको बुटवलस्थित लुम्विनी प्रादेशिक अस्पतालमा परीक्षण गरिएको थियो । लामो देखिदेखि पक्षघात, सुगर, प्रेसरको विरामी रहेका उनको बुधवार मृत्यु भएको देवदह नगरपालिका–३, का वडाअध्यक्ष बैकुण्ठबहादुर कुँवरले जानकारी दिए । कोरोना पोजेटिभ भेटिएका पुरुषको नेपाली सेनाले दाहसंस्कारको तयारी गरिरहेको देवदह नगर स्वास्थ्य शाखा प्रमुख काशीनाथ बन्जाडेले बताए ।

देवदह नगरपालिकामा कोरोना संक्रमणका कारण मृत्यु हुनेको संख्या दुई पुगेको छ । कोरोना पोजेटिभका कारण पुरुषको मृत्यु भएपछि देवदह–३, शिसपुरलाई शिल गरिएको छ । शिसपुरका स्थानीयवासीलाई घरबाट वाहिर निस्कन र वाहिरबाट शिसपुर जान रोक लगाईएको वडाअध्यक्ष कुँवरले बताए ।