चार सय गर्भवतीलाई पोषण उपहार

काठमाडौं । कैलालीको जानकी गाउँपालिकाले चार सयजना गर्भवती महिलालाई पोषण उपहार प्रदान गरेको छ । गाउँपालिकाले स्वास्थ्य संस्थामा नियमित गर्भजाँच गराइरहेका गर्भवतीलाई पोषणस्वरुप खानेकुरा र नगद प्रदान गरेको हो ।

गाउँपालिकाले हरेक महिलालाई पोषण उपहारमा एक क्यारेट अण्डा, आयोडिन नुन, सरसफाइका सामान र एक हजार रुपैयाँ प्रदान गरेको छ ।

अमरावतीकी जमुनाकुमारी चौधरीले गाउँपालिकाले गर्भवती महिलाको स्वास्थ्यमा ख्याल गर्न सन्देश दिएको बताइन् । गाउँपालिकाले आमा र बच्चाको पोषणमा सुधार ल्याउनुका साथै मातृशिशु मृत्युदर घटाउन सहयोग पुगोस् भनी कोसेली कार्यक्रम शुरु गरेको हो ।

गाउँपालिकाले कोसेली वितरणका लागि सात लाख रुपैयाँ बजेट विनियोजन गरेको छ । गाउँपालिकाले दुई चरणमा कोसेली दिने तयारी गरेको छ । पहिलो चरणमा फागुन महिनामा र दोस्रो चरणमा जेठ मसान्तमा कोसेली दिइने गाउँपालिकाका अध्यक्ष प्रदीपकुमार चौधरीले जानकारी दिए ।