नयाँवानेश्वरको सार्वजनिक शौचालय वडालाई हस्तान्तरण
काठमाडौं । काठमाडौंको नयाँवानेश्वरस्थित छक्कुपक्कु पार्कको आडमा निर्माण गरिएको सार्वजनिक शौचालय वडा कार्यालयलाई हस्तान्तरण गरिएको छ ।
बुधबार आयोजित कार्यक्रममा शौचालयको साँचो वडा अध्यक्ष रामकुमार केसीलाई हस्तान्तरण गरिएको हो । व्यवसायिक सार्वजनिक उत्तरदायित्वअन्तर्गत एभरेष्ट बैङ्कले करीब २० लाख रुपैयाँ खर्च गरेर छक्कुपक्कु पार्कको मर्मत तथा सार्वजनिक शौचालय निर्माण गरेको हो । नवनिर्मित शौचालयमा पुरुषका लागि ४ वटा पिसाब फेर्ने युरिनल र एउटा दिशा गर्ने ठाउँ, महिलाका लागि २ वटा र अपाङ्गता भएका व्यक्तिका लागि एउटा छुट्टाछुट्टै ठाउँ छन् ।
शौचालयको साँचो बुझिसकेपछि वडाध्यक्ष केसीले राजधानीको केन्द्रमा मानिस आउँदा शौचालय नभएर खेप्नु परेको सास्ती अब हट्ने बताए ।
अपाङ्गता भएका व्यक्ति, पर्यटक र जेष्ठ नागरिकलाई शौचालय निःशुल्क हुनेछ । यसको दिगो व्यवस्थापनका लागि अन्य उपभोक्ताबाट सेवा शुल्क संकलन गरिनेछ । यसरी संकलन भएको रकम सरसफाइ र बायोग्याँस उत्पादनमा खर्च हुनेछ । वडाले यस कामका लागि एरोसान सन्टेनेबल स्यानिटेसनले सञ्चालन गरेको सरसफाइ सहकारी संस्थासँग सहकार्य अघि बढाएको छ ।
शौचालय हस्तान्तरण कार्यक्रममा बैङ्कका नायव महाप्रबन्धक आशुतोष शर्माले व्यवसायिक संस्थागत उत्तरदायित्वअन्तर्गत वडासँग थप सहकार्य हुने बताए ।
त्यस्तै संस्थागत उत्तरदायित्व समितिका सदस्य डा. गणेश गुरुङले निर्माण भएको शौचालय दिगो र गुणस्तरीय सेवा दिन सक्ने गरी सञ्चालन गरिनुपर्ने बताए । प्रमुख बजार व्यवस्थापक पुष्पराज उप्रेतीका अनुसार बैङ्कले सामाजिक उत्तरदायित्वअन्तर्गत पशुपति क्षेत्रमा वातावरणमैत्री शवदाह क्षेत्र निर्माण गर्ने तयारी छ ।
