नेपाली सेनाले संचालन गरेको स्वास्थ्य शिविरमा ३४ हजारको उपचार
काठमाडौं । नेपाली सेनाले नागरिकसँगको सम्बन्ध विस्तारमा सहयोग पुर्याउने उद्देश्यले स्वास्थ्य सेवा नपुगेका स्थानहरुमा गरेको स्वास्थ्य शिविर उपलब्धिमूलक भएको जनाएको छ ।
आइतबार पत्रकार सम्मेलन गरी सेनाले मंसिर २७ देखि पुष ६ गतेसम्म महोत्तरीको सोनमा गाउँपालिकामा पनि स्वास्थ्य शिविर सञ्चालन गरेको जनाएको छ ।
पत्रकार सम्मेलनमा नेपाली सेनाका प्रवक्ता विज्ञानदेव पाण्डेले शिविरमा गरी ३४ हजार १ सय ७२ जनाको स्वास्थ्य उपचार गरिएको र ३ सय ३९ जनाको शल्यकृया गरिएको जानकारी दिए । स्वास्थ्य शिविरमा १ सय ८० जना विषेशज्ञ चिकित्सकहरु र १ सय १० जना अन्य स्वास्थ्यकर्मीहरुले सेवा दिएको उनले बताए ।
नेपाली सेनाले स्वास्थ्य मन्त्रालय, प्रदेश सरकार र स्थानीय तहसँगको सहकार्यमा स्वास्थ्य सेवा नपुगेका ठाउँहरुमा शिविर मार्फत स्वास्थ्य सेवा दिदै आएको जनाएको छ ।
जस अनुसार २०७४ सालमा १ सय ३३ स्थानमा, २०७५ मा २ सय ६४ स्थानमा र २०७६ को अहिलेसम्म ८३ स्थानमा स्वास्थ्य शिविर सञ्चालन गरेको सेनाले जनाएको छ ।
