अब मोबाइल एपबाटै औषधिबारे जानकारी
काठमाडौ । नेपालमा प्रयोग हुने अत्यावश्यक औषधिको जानकारी अब मोबाइल एपबाटै लिन सकिने भएको छ । स्वास्थ्य तथा जनसंख्या मन्त्रालय र औषधि व्यवस्था विभागले सूचीकृत ३ सय ९२ प्रकारका औषधिबारे जानकारी दिन ‘नेप्लिज नेसनल फमुलरी’ एप आइतबार सार्वजनिक गरेको हो ।
स्वास्थ्य तथा जनसंख्यामन्त्री भानुभक्त ढकालले एपबारे जानकारी, कसरी हेर्ने, प्रयोग गर्ने भन्नेबारे गाउँगाउँमा रहेर काम गरिरहेका स्वास्थ्यकर्मीलाई तालिम दिनु आवश्यक भएको बताए ।
विभागका महानिर्देशक पानबहादुर क्षेत्रीले एप डाउनलोड गरी प्रयोगकर्ताले औषधिको प्रयोग गर्न सकिने अवस्था, त्यसबाट हुने असर, साइड इफेक्ट, सावधानी आदिबारे जानकारी लिन सकिने र ठगिनबाट जोगिने बताए । एपले नेपालमा प्रयोग हुने सबै अत्यावश्यक औषधि, त्यसको उपलब्धताबारे जानकारी लिन सकिने उनको भनाइ थियो ।
केही प्राविधिक कारणले ढिलाइ भएको २ जनावरीभित्रमा एप पूर्ण रूपमा सञ्चालन हुने उनले जानकारी दिए । विभागले एप विशेषगरी चिकित्सक र फार्मेसिस्टका लागि सहयोगी हुने जनाएको छ ।
