प्रदेश दुईमा छोरी बीमा सप्ताह संचालन गरिने
जनकपुरधाम । प्रदेश दुईको सरकारले बेटी पढाउ बेटी बचाउ कार्यक्रम अन्तर्गत संचालनमा ल्याएको छोरी शिक्षा विमालाई व्यापक बनाउदै जनस्तरसम्म पुर्याउन छोरी बीमा सप्ताह संचालन गर्ने भएको छ ।
२०७५ माघ १ गते यता प्रदेशमा जन्मेका छोरीहरुको शिक्षाको लागी बीमा गर्ने सरकारले घोषणा गरे पनि कर्मचारी अभाव लगायतका कारणले सोचे अनुरुपको बीमा हुन नसकेपछि प्रदेश सरकारले प्रत्येक स्थानीय तहमा शिविर संचालन गरि उनीहरुको घरदैलोमै पुगी बीमा लगायतका अन्य सुविधा प्रदान गर्ने गरि सप्ताह मनाउने निर्णय गरेको छ ।
माघ २ गतेदेखि प्रदेशका आठ वटै जिल्लामा शिविर संचालन गरिने बेटी पढाउ बेटी बचाउ अभियानका संयोजक प्रियंका यादवले जानकारी दिइन् । उक्त शिविरमा शिक्षा बीमाका साथै छोरीहरुको स्वास्थ्य जाँच, निःशुल्क औषधी वितरण सहितका कार्यक्रम समेत गरिने जनाइएको छ ।
माघ २ गतेदेखि शुरु हुने छोरी बीमा सप्ताह सबै स्थानीय तहमा पुगी सम्पन्न हुने छन । यस अभियानले विभिन्न कारण विमा गराउन नसकेका छोरीहरुलाई समेटिदै पछिल्लो एक वर्ष भित्र जन्मेका छोरीहरुको विमा शत प्रतिशत पुर्याउने लक्ष्य लिइएको छ ।
