सुशीला सरकारले खारेज गरेको स्वकीय सचिवको सुविधा ब्यूँताउन रास्वपा सांसदको माग

काठमाडौँ । राष्ट्रिय स्वतन्त्र पार्टीले सांसदहरुको वृत्ति विकासका लागि लगानी गर्न सरकारसँग माग गरेको छ । बिहीबारको प्रतिनिधिसभा बैठकमा रास्वपाका सांसद विपिन अचार्यले अर्बौं लगानी गरी गरिएको निर्वाचनबाट सांसदहरु आएका र ती सांसदहरुको वृत्ति विकासमा लगानी गर्दा करोडौँ नागरिकलाई फाइदा पुग्ने भएकाले राज्यले लगानी गर्नुपर्ने बताएका हुन् ।

उनले त्यसको सुरुवात सांसदहरुलाई स्वकीय सचिवबाट सुरु गर्नुपर्ने माग गरे । उनले सांसदहरुलाई नीतिगत, कानुनी र बहुआयामिक पक्षमा धेरै सहयोग चाहिएको बताए । उनले राज्य यसमा लगानी गर्न किन हिचकिचाइरहेको छ भन्दै प्रश्न गरे ।

उनले भने, ‘सांसदहरुलाई सक्षम बनाउने विषय नीति तथा कार्यक्रममा समेटियोस् । पहिलो लगानी सांसदहरुलाई स्वकीय सुविधा दिएर सुरु गरियोस् ।’

यसअघि सुशीला कार्की नेतृत्वको सरकारले सांसदसहित राजनीतिक पदाधिकारीहरुका स्वकीय सचिवको सुविधा खारेज गरेको थियो । कार्की सरकारको निर्णयमा भनिएको थियो, ‘राष्ट्रपति, उपराष्ट्रपति, प्रधानमन्त्री, सभामुख र राष्ट्रिय सभाका अध्यक्ष, प्रदेश प्रमुख, नेपाल सरकार तथा प्रदेश सरकारका मन्त्री बाहेक सांसद लगायत अन्य राजनीतिक पदाधिकारीको स्वकीय सचिवको सुविधा खारेज गर्ने ।’

तर अनावश्यक खर्च घटाउने नीति लिने भन्ने सत्तापक्षकै सांसदले स्वकीय सचिव माग्नु अचम्मको विषय बनेको छ ।