वाशिङ्टन । ट्रम्प प्रशासनले जेनजी नेतृत्वको प्रदर्शनपछि नेपाल निर्वाचनतर्फ अघि बढिरहेका बेला आगामी चुनाव शान्तिपूर्ण र सुरक्षित हुने विश्वास व्यक्त गरेको छ ।
बुधबार प्रतिनिधिसभाको दक्षिण तथा मध्य एसिया उपसमितिको सुनुवाइमा दक्षिण तथा मध्य एसिया मामिलाका सहायक विदेश सचिव पल कपुरले केही महिनाको राजनीतिक अस्थिरतापछि वाशिङ्टन नेपालका आगामी सरकारसँग सहकार्य गर्न तयार रहेको बताएका हुन् ।
कपुरले नेपालमा भएको परिवर्तनलाई दक्षिण एसियाभर देखिँदै गएको लोकतान्त्रिक रूपान्तरणको लहरसँग जोड्दै युवाहरूको आन्दोलनले पुराना सरकारहरू हटाएर लोकतान्त्रिक सहभागिताको अवसर सिर्जना गरेको उल्लेख गरे ।
सेप्टेम्बरमा भ्रष्टाचारविरोधी जेनजीको व्यापक प्रदर्शनपछि प्रधानमन्त्रीले राजीनामा दिएका थिए, जसले अर्को महिनाका लागि नयाँ निर्वाचनको बाटो खोलेको हो ।
‘नेपालमा पनि सुरक्षित र शान्तिपूर्ण निर्वाचन प्रक्रिया हुने हाम्रो विश्वास छ, र जो विजयी हुन्छ उसैसँग काम गर्न हामी तयार छौँ,’ कपुरले भने। उपसमितिका अध्यक्ष बिल हुइजेन्गाले नेपाल र छिमेकी बंगलादेशका राजनीतिक परिवर्तनलाई दक्षिण एसियामा अमेरिकी संलग्नताका नयाँ अध्यायका रूपमा वर्णन गरे ।
डेमोक्रेटिक र्याङ्किङ सदस्य सिड्नी कामलागर–डोभले यी रूपान्तरणलाई जिम्मेवार शासनप्रति बढ्दो क्षेत्रीय मागलाई समर्थन गर्ने अवसरका रूपमा लिइन् ।
छलफलमा भारत र चीनबीच रणनीतिक रूपमा अवस्थित नेपाल संवेदनशील भू–राजनीतिक स्थानमा रहेको विषयमा द्विदलीय सहमति देखिएको थियो । कपुरले दक्षिण एसियामा कुनै एकल शक्तिको वर्चस्व रोक्नु अमेरिकाको मुख्य उद्देश्य रहेको पनि दोहोर्याए ।
प्रतिक्रिया