हतियार लुटिनु र कैदी भागेकाले जनताले असुरक्षित महसुस गर्नु स्वाभाविकः कानुनमन्त्री सिन्हा

काठमाडौं । कानून, न्याय तथा संसदीय मामिला मन्त्री अनिल कुमार सिंन्हाले जेनजी आन्दोलनका क्रममा घटेका घटनाहरु नियोजित प्रकृतिका भएको बताएका छन् ।

शुक्रबार राष्ट्रिय सभाको कार्यव्यवस्था परामर्श समितिको बैठकमा मन्त्री सिंन्हाले भदौ २३ र २४ गतेका घटनामा नहुनुपर्ने धेरै घटना घटेको उल्लेख गरे । उनले हतियार लुटिएका घटनाबाट जनताले असुरक्षित महसुस गर्नु स्वाभाविक भएको बताए ।

उनले भने, ‘जेनजी आन्दोलनमा धेरै हतियारहरू लुटिएका छन्, जेलबाट कैदीहरू भागेका छन् । जनताले अलिकति असुरक्षित महसुस गर्नु स्वाभाविक हो ।’

मन्त्री सिन्हाले चुनौतीपूर्ण अवस्थामाझ पनि हतियारसहितका अभियुक्तहरू दैनिक रूपमा पक्राउ भइरहेका बताए । उनले थपे, ‘सुरक्षाकर्मीहरूले भागेका कैदी र भदौ २४ गतेको घटनामा संलग्न व्यक्तिहरूको पहिचान गर्दै राम्रो अनुसन्धानको नमूना प्रस्तुत गरेका छन् ।’

उनले जेनजी आन्दोलनका क्रममा भएका घटनामाथि अहिले व्यापक अनुसन्धान भइरहेको बताए । बैठकमा राष्ट्रियसभाका अध्यक्ष नारायण प्रसाद दाहालले राष्ट्रिय सभा सञ्चालनका क्रममा देखिएका कानूनी जटिलता र अस्पष्टताबारे ध्यानाकर्षण गराए ।

अध्यक्ष दाहालले भने, ‘राष्ट्रिय सभा सञ्चालनका लागि केही कानूनी जटिलता देखिएका छन् । मन्त्री स्वयं कानूनमन्त्री भएकाले र महासचिव पनि त्यस्ता विषयमा जानकार भएकाले यी असहजता र अस्पष्टताहरू सरकारले गम्भीरताका साथ समाधान गर्नेछ भन्ने अपेक्षा छ ।’

उनले राष्ट्रिय सभाले सरकारका अप्ठ्याराहरू समाधान गर्न महत्त्वपूर्ण भूमिका खेल्ने उल्लेख गर्दै बैठक सञ्चालनका लागि आवश्यक पूर्वाधारमा सरकारले गम्भीर ध्यान दिनुपर्नेमा जोड दिए ।