यो बजेट केबल माओवादीका ३२ सांसदका लागि हो, २७५ जना सांसदको भनेर सोच्नु दिवास्वप्ना होः अमरेश सिंह
काठमाडौं । स्वतन्त्र सांसद डा.अमरेशकुमार सिंहले बजेट नेकपा माओवादी केन्द्रका सांसदका लागि मात्र आएको आरोप लगाएका छन् ।
आइतबारको प्रतिनिधिसभा बैठकमा विभिन्न मन्त्रालयमाथिको खर्च कटौतीको प्रस्ताव पेश गर्दै सांसद सिंहले माओवादी समाप्त हुने अन्तिम तगारोमा रहेको हुँदा आगामी आर्थिक वर्षको बजेट ३२ सांसदका लागि मात्र छुट्टयाएको आरोप लगाए ।
उनले अर्थमन्त्रीले बजेट केही व्यापारीहरुको इन्ट्रेस्टमा बनाएको आरोपसमेत लगाए । उनले भने, ‘यो बजेट केही व्यापारीले बनाएको हो, अर्थमन्त्रीको इन्ट्रेस्टमा । यो बजेट केबल माओवादीका ३२ सांसदका लागि हो । २७५ जना सांसदको भनेर सोच्नु दिवास्वप्ना हो । किनकि माओवादी पार्टी समाप्त हुने अन्तिम तगारोमा छ । आफ्नो सांसद भएको ठाउँ र जित्न सक्ने ठाउँमा मात्र बजेट खन्याइएको छ । हामीजस्ता निर्दा सांसदकोमा बजेट छैन ।’