नेप्सेमा निरन्तर गिरावट

काठमाडौं । शेयर बजार नेप्सेमा निरन्तर गिरावट आएको छ । आइतबार ११ अंकले घटेको नेप्से परिसूचक सोमबार १३ अंकले घटेको हो । पछिल्लो समय निरन्तर घटिरहेको नेप्सेमा कारोबार रकममा समेत संकुचन आउन थालेको छ । आइतबार ११ अंकले घट्दा जम्मा ७४ करोड रुपैयाँको कारोबार भएको नेप्सेमा सोमबार ८३ करोड रुपैयाँको कारोबार भएको छ ।

यसक्रममा २६ लाख १३ हजार कित्ता सेयर किनबेच भएको छ । कारोबारमा आएका १३ समूहमध्ये म्युचुअल फण्ड समूहमा भने सुधार आएको छ । यसबाहेक १२ वटा समूह राताम्मे बनेका छन् । जीवन बीमा समूहमा ५२ अंकको गिरावट आउँदा निर्जीवन बीमा समूहमा ४६ अंकको गिरावट आएको छ । यस्तै, जलविद्युत र लघुवित्त समूहमा समान ३१÷३१ अंकको गिरावट आएको छ ।

अन्य समूहमा २३ अंकको गिरावट आउँदा वित्त समूह १६ अंकको गिरावट आएको छ । यसैगरी, विकास बैंक समूहमा १४, उत्पादनमूलक समूहमा १३ र होटल तथा टुरिजम समूहमा ६ अंकको गिरावट आएको छ । सोमबार युनाइटेड आईडीआई आरबी हाइड्रोपावर कम्पनीको सेयर मूल्य सबैभन्दा धेरै बढेको छ ।

यस कम्पनीको सेयर मूल्यमा ४.१७ प्रतिशतको सुधार आउँदै प्रतिकित्ता ५५० रुपैयाँ पुगेको छ । यस्तै, सामुदायिक लघुवित्त वित्तीय संस्थाको सेयर मूल्यमा ५.८७ प्रतिशतको गिरावट आउँदै प्रतिकित्ता १३ सय ८० रुपैयाँ कायम भएको छ । सेयर बजार घटेपनि आज नबिल बैंकको सेयर सबैभन्दा धेरै कारोबार भएको छ ।

आज यस कम्पनीको ४ करोड ७ लाख ५४ हजार रुपैयाँ बराबरको सेयर कारोबार भएको हो । यस्तै, सनराइज फस्ट म्युचुअल फण्डको ३ लाख ८४ हजार कित्ता सेयर किनबेच भएको छ ।