परियोजना धितो राखेर कर्जा उपलब्ध गराउन महासङ्घको माग
काठमाडौं । नेपाल उद्योग वाणिज्य महासङ्घले परियोजना धितो कर्जालाई प्राथमिकतामा राखेर कार्यान्वयन गर्नुपर्नेमा जोड दिँदै बिहीबार सुझावसहितको सम्भाव्यता अध्ययनको प्रतिवेदन नेपाल राष्ट्र बैंकका गभर्नर महाप्रसाद अधिकारीलाई बुझाएको छ ।
महासङ्घले परियोजनामा आधारित कर्जा प्रवाह गर्नुपर्ने धारणा राख्दै आएको थियो । कोभिड–१९ को प्रभावले थलिएको अर्थतन्त्रको पुनरूत्थानसँगै साना मझौला उद्यम र स्टार्ट अपको विस्तारका लागि सो अवधारणा प्रभावकारी रहेको ठहर गर्दै अध्ययन प्रतिवेदन बुझाइएको हो ।
महासङ्घका अध्यक्ष शेखर गोल्छाले उक्त प्रतिवदेन गभर्नर अधिकारीलाई बुझाउँदै साना तथा मझौला उद्यम परियोजना धितोका आधारमा कर्जा लगानी गर्न आग्रह गरे ।
अध्ययन प्रतिवेदनमार्फत स्टार्ट अपलाई पूँजी उपलब्ध गराउन कूल लगानीको १० प्रतिशत परियोजना धितोमा कर्जा प्रवाह गरिनुपर्ने तथा परियोजनाको मूल्याङ्कनको ६० प्रतिशत कर्जा उपलब्ध गराउन सकिने सुुझाव दिइएको छ ।
त्यस्तै निश्चित सीमासम्मको कर्जाको प्रत्याभूति संयन्त्र र बीमा विस्तार गर्दै जोखिम न्यूनीकरण संयन्त्र लागू गर्न बैंकको क्षमता विकास गर्नुपर्ने प्रतिवेदनमा औंल्याइएको छ ।
प्रतिवेदन बुुझ्दै गर्भनर अधिकारीले महासङ्घले पेश गरेको साना तथा मझौला उद्यम एवं स्टार्टअप उद्यम परियोजना धितो कर्जा प्रतिवेदन अध्ययन गरी प्राथमिकताका साथ कार्यान्वयनमा लैजाने प्रतिबद्धता जनाए । अध्ययन प्रतिवेदनका लागि उनले महासङ्घलाई धन्यवाद दिए । सम्भाव्यता अध्ययन अन्तर्राष्ट्रिय श्रम सङ्गठन, नेपाल कार्यालय र युके एडको सहयोगमा गरिएको हो ।
