हाम्रो नयाँ कृषि सहकारी संस्था औपचारिक रुपमा सञ्चालनमा
काठमाडौ । विदेशबाट फर्किएका युवाहरूलाई कृषि क्षेत्रमा आकर्षण गर्ने उद्देश्यले र व्यवसायिक कृषिका लागि सहुलियत पूर्ण कृषि कर्जा दिने हेतुले कृषि सहकारी संस्थाले काम सुरु भएको छ ।
बिहीबार नक्सालस्थित कार्यालयमा एक कार्यक्रम गरी संस्थाको उद्घाटन गरिएको हो । ७७ वटै जिल्लामा संचालन गरिएको हाम्रो कृषि सहकारी संस्थाले लगनशीलता, दृढता र पारदर्शितालाई मुलमन्त्र मानेर कार्य गर्ने भएको छ ।
हाम्रो नयाँ कृषि सहकारी संस्था लिमिटेडको संस्थापक अध्यक्ष पूर्वमन्त्री शक्ति बहादुर बस्नेतले अबको कार्य क्षेत्र भनेको कृषिको कार्य भएको र यस क्षेत्रमा सकृयताका साथ अगाडि बढ्न सबैलाई आग्रह गरेका छन् ।
कृषि क्षेत्रलाई व्यापकता बनाउनु पर्ने, संस्थाको लक्ष्य उद्देश्य पुरा गर्नका लागि कटिवद्ध भएर अग्रसर हुन पर्ने सांसद नवराज सिलवालले बताए । कार्यक्रममा पूर्वमन्त्री सत्या पहाडी, एनआरएनका अध्यक्ष कुमार पन्तलगायत हाम्रो नयाँ कृषि सहकारी संस्थाका सम्पूर्ण पदाधिकारी र शेयर सदस्यहरूको उपस्थिति रहेको थियो ।
सहकारीका अध्यक्ष सूर्य बहादुर गुरुङ्गले हामी जन्मदेखि नै कृषि गरेर नै हुर्किएका र सामूहिक सहकारी गर्न सिकेको अनुभव रहेकाले यसलाई त्यसैअनुरुप संचालन गरिने बताए ।
