बन्द हड्ताललगायतका गतिविधि रोकेर स्थिरता कायम गर्न निजी क्षेत्रको आग्रह
काठमाडौं । नेपाल उद्योग वाणिज्य महासंघ, नेपाल उद्योग परिसंघ र नेपाल चेम्बर अफ कमर्शले विगतका राजनीतिक प्रतिवद्धता सम्झेर बन्द हड्तालका कार्यक्रम फिर्ता लिन राजनीतिक दलहरुलाई आग्रह गरेका छन्।
नेकपाको प्रचण्ड-नेपाल समूहले आह्वान गरेको हड्तालको पूर्वसन्ध्यामा तीन व्यवसायिक संगठनले संयुक्त विज्ञप्ति जारी गरी बन्द हड्ताल लगायतका गतिविधि रोकेर स्थिरता कायम गर्न आग्रह गरेका हुन्। कोभिड१९ पछि विस्तारै लयमा फर्कन लागेको अर्थतन्त्रलाई बन्दले नकारात्मक प्रभाव पार्ने तीन संस्थाको निष्कर्ष छ।
बन्द हड्ताल लगायतका राजनीतिक गतिविधि रोकी स्थीरता कायम गर्न निजी क्षेत्रको अपिल
कोभिड १९ महामारीका कारण संकटमा रहेको अर्थतन्त्रलाई राजनीतिक अस्थिरता र बन्द हडताल जस्ता गतिविधिले थप जोखिममा पार्ने देखिएको छ । चालु आर्थिक बर्षको दोस्रो त्रैमासबाट विस्तारै लयमा फर्किन थालेको अर्थतन्त्रलाई पछिल्लो समय बिकसित राजनीतिक घटनाक्रमले गम्भीर नकारात्मक असर पार्ने निश्चित छ ।
विश्वव्यापी महाव्याधिले आक्रान्त सर्वसाधारण र उद्यमी व्यवसायीलाई वन्द हडताल, चक्काजाम एवं आवागमनमा अवरोध हुने किसिमका भेला सम्मेलन लगायतका गतिविधिले पेशा व्यवसायमा अवरोध भई आयआर्जनमा प्रत्यक्ष प्रभाव परेर थप पीडा दिनेछ । यस्तो बिषम परिस्थितिमा समस्याको शान्तिपूर्ण समाधान निकाल्ने विकल्प पन्छाई सर्वसाधारण र निजी क्षेत्रको काम गर्न पाउने लगायतका नैसर्गिक अधिकार कुण्ठित पार्न नहुने निजी क्षेत्रको ठहर छ ।
बन्द हडतालका कारण साना उद्यमी व्यवसायी र दैनिक ज्यालामा गुजारा चलाउने सर्वसाधारणलाई सबैभन्दा बढि असर पर्नेतर्फ राजनीतिक दलहरूको ध्यानाकर्षण गराउन चाहन्छौ । साथै नयाँ संविधान निर्माण पश्चात आर्थिक विकासलाई प्राथमिकतामा राखि बन्द, हडताल, चक्काजाम लगायतका गतिविधि नगर्ने सबै राजनीतिक दलहरूले गरेको प्रतिवद्धतालाई पनि हामी यहा स्मरण गराउन चाहान्छौ ।
अहिलेको कठिन परिस्थिति, विगतका हाम्रा तीता अनुभव समेतलाई गम्भीररूपमा मनन गरी बन्द हड्ताल लगायतका कार्यक्रमको घोषणा गरिएको हो भने तत्काल फिर्ता लिई मुलुकलाई थप संकटमा नधकेल्न नेपाल उद्योग वाणिज्य महासंघ, नेपाल उद्योग परिसंघ र नेपाल चेम्बर अफ कमर्श समस्त राजनीतिक दलहरूमा हार्दिक अपिल गर्दछ ।
