अनसनमा एकदिने असन महोत्सव आयोजना
काठमाडौं । काठमाडौंको व्यापारिक बजार असनको ऐतिहासिकता प्रवद्र्धन गर्ने उद्देश्यले शनिबार एकदिने महोत्सव आयोजना गरिएको छ । असन सेवा समाजको सहकार्यमा वडा नम्बर २७ ले असन बजारको मूख्य चोकमा महोत्सव आयोजना गरेको हो ।
‘नेपालको पहिचान र गौरव भएको नेपाल संबत् सरकार आफैंले सञ्चालन गर्नुपर्छ’ भन्ने मुल नारासहित असन चोकमा महोत्सव चलाइएको हो । महोत्सववलाई सम्बोधन गर्दै काठमाडौं महानगरपालिकाका मेयर विद्यासुन्दर शाक्यले नेवारी संस्कृतिको संरक्षणका लागि सबै नेवार समुदायहरु मिलेर अगाडी बढ्नुपर्ने बताए ।
त्यस्तै नेपाल संवत् न्हुँद राष्ट्रिय समारोह समितिका संयोजक रमेश महर्जनले नेवारी संस्कृति र मौलिकता जोगाउन सके पर्यटन क्षेत्रको समेत विकास हुने बताए ।
महोत्सवमा नेवारी परिकारहरु यमरी, बारा, मःम, छोइला, कचिला, सफुमिचा, चोही, बः लगायतका स्टल, नेवारी साहित्य, सृजना र संस्कृति सम्बन्धि पुस्तकका स्टलहरु राखिएका छन् । त्यस्तै परम्परागत नाच र गायन गरी ३० वटा प्रस्तुति समेत गरिएको थियो ।
