पर्यटन वर्षमा होटलको कोठामा ३० र खानामा १५ प्रतिशत छुट दिइने
काठमाडौं । होटल व्यवसायीले नेपाल भ्रमण वर्ष २०२० लाई लक्षित गर्दै छुट योजना सार्वजनिक गरेका छन् । होटल संघ नेपाल (हान) ले भ्रमण वर्षलाई लक्षित गरी नेपाल आउने सबै विदेशी पाहुनाका लागि छुट दिने घोषणा गरेको हो ।
हानका महासचिव साजन शाक्यका अनुसार अब एक वर्षभर होटेलले आफ्नो रुमको मूल्यमा ३० प्रतिशत छुट दिने भएका छन् । खानामा पनि १५ प्रतिशत छुट दिने घोषणा हानले गरेको छ ।
छुट हानका सदस्य होटेलमा मात्र उपलब्ध हुनेछ । हानमा ठूलो लगानीका पर्यटकस्तरीयदेखि तारे होटेल सञ्चालकहरु आवद्ध रहेका छन् ।
यसअघि भ्रमण वर्ष मूल आयोजक समिति बैठकले सबै सरोकारवाला निकायबाट भ्रमण वर्षलाई लक्षित गरी के गर्न सकिन्छ भनी विवरण माग गरिएको थियो । सोही आधारमा हानले छुट योजना सार्वजनिक गरेको हो ।
