परिच्छेद सेनको निर्देशनमा चलचित्र ‘महाराजधिराज’ निर्माण हुने
काठमाडौं । नेपाली चलचित्र ‘महाराजधिराज’ निर्माण हुने भएको छ । पल शाहलाई लिएर निर्देशक परिच्छेद सेनले नयाँ फिल्म ‘महाराजधिराज’को घोषणा गरेका हुन् ।
मंगलबार सार्वजनिक टिजर पोस्टरमा अभिनेता पललाई दोहोरो भूमिकामा देख्न सकिन्छ । एउटामा तस्बिरमा उनी ‘न्युड’ अवस्थामा गद्दीमा बसेको देख्न सकिन्छ । अर्को पात्रमा भने उनी श्रीपेच र शाही पोशाकसहित उभिएका छन् ।
अभिनेता शाहले सामाजिक सञ्जालमार्फत चलचित्रको प्रदर्शन मितिसमेत घोषणा गरेका छन् । उनका अनुसार चलचित्र आगामी दशैँको फूलपातिमा रिलिज हुनेछ ।
यो चलचित्रको पटकथाकार पनि परिच्छेद नै छन् । छत्रेश्वर म्यानेजमेन्ट प्रालिको ब्यानरमा यसलाई टोपेन्द्र विष्ट, चक्रबहादुर केसी र रवि खड्काले निर्माण गर्न लागेका हुन् । प्रस्तुतकर्तामा विराज विष्ट छन् ।
