बालगीत ‘हुक्काभित्र ट्वार्र ! ट्वार्र !’
काठमाडौँ । गीतकार रामबाबु सुवेदीका शब्द र वसन्त सापकोटाको सङ्गीतमा बालगीत ‘हुक्काभित्र ट्वार्र! ट्वार्र!’ को श्रव्यदृश्य सार्वजनिक भएको छ।
हुक्काभित्र ट्वार्र! ट्वार्र! चेतनामूलक बालगीत हो। यसमा हाम्रा नानीबाबुहरू प्रश्न गर्छन् कि तमाखु, चुरोट, खैनी किन सेवन गर्ने? यी सबै स्वास्थ्यका लागि हानिकारक छन्।
उनीहरू भन्छन्, ‘हामी नानीबाबुहरू अम्मली छैनौँ, हामी स्वस्थ नेपालका स्वस्थ बालबालिका हौँ। नानीबाबुहरूका सत्य भनाइ हाम्रा लागि अचुक वाण हुन्’, भिडियोमा भनिएको छ।
बाल नमूना माध्यमिक विद्यालयमा शुक्रबार भएको एक कार्यक्रममा पूर्वसांसद माया ज्ञवाली, ललितकला प्रज्ञा प्रतिष्ठानका पूर्वकुलपति केके कर्माचार्य, वरिष्ठ सङ्गीतकार एवं गायक रामेश श्रेष्ठ र अनन्त वाग्लेलगायत बालसाहित्यकारको उपस्थितिमा उक्त भिडियो सार्वजनिक गरिएको हो।
उक्त भिडियोमा पूजा देवकोटा, दर्शिल पन्त, टेरेसा विश्वकर्मा र प्रशन्न तामाङको स्वर रहेको छभने यसको निर्माणमा स्वास्थ्य तथा जनसङ्ख्या मन्त्रालयले सहयोग गरेको छ।
भिडियोमा बाल नमूना माध्यमिक विद्यालयका बालबालिकाको नृत्य र अभिनय छ। आचार्य गोपालको निर्देशनमा बनेको भिडियोमा कलाकार रामचन्द्र अधिकारीले पनि अभिनय गरेका छन्।
