प्रेमराजा महत र अस्मिता परियारको ‘पीपल डाँडे साईंली’
काठमाडौं । लोकप्रिय गायक तथा संगीतकार प्रेमराजा महतले लामो समयपछि लोकशैलीको नयाँ गीत सार्वजनिक गरेका छन् । ट्रि इन्टरटेन्मेन्टको प्रस्तुतिमा तयार भएको लोक शैलीको नयाँ गीत ‘पीपल डाँडे साईंली’लाई अस्मिता परियारसँग मिलेर प्रेमराजाले गाएका छन् ।
यो गीतमा गायक प्रेमराजा महत र गायिका अस्मिता परियारको स्वर छ । गीतको शब्द तथा संगीत पनि प्रेमराजा महतले नै तयार पारेका हुन् । ‘बाँझो खेतमा, हिउचुलीमा हिउँ, बिदेशीको हरियो डलर’ जस्ता चर्चित गीतका गायक महतले यो गीत आफूले ४ दशक अगाडि नै कल्पना गरेको बताए ।
दीपक नेपालीको निर्देशनमा तयार भएको भिडियोमा प्रेमराजा महत, दीपाश्री निरौला, डेलविस, राज, जुना सुन्दास र सलिना खत्रीको अभिनय रहेको छ । दिनेश दर्शनधारी, यशोधा राई र सुवर्ण महर्जनको लगानीमा बनेको यो गीतमा नवराज उप्रेतीको छायाँकन, प्रविण भट्टको सम्पादन छ । भिडियोमा मौसम हिमालीको कोरियोग्राफी छ ।
ट्रि इन्टरटेन्मेन्टले बुधबार काठमाडौंमा एक कार्यक्रमको आयोजना गर्दै गीत सार्वजनिक गरेको हो । कार्यक्रममा कलाकार दीपाश्री निरौलाले प्रेमराज महतसँग पहिलो पटक सहकार्य गर्न पाउँदा खुसी लागेको बताइन् । गायक तथा कलाकार प्रेमराजा महतले पनि अब आफू गीतसंगीतमा सक्रिय रुपमा लाग्ने बताएका थिए ।
