पोखरामा इन्जिनियर व्यवसायी दर्ताको परीक्षा सञ्चालन
काठमाडौं । नेपाल इन्जिनियरिङ परिषद्ले काठमाडौँपछि पहिलोपटक पोखरामा इन्जिनियर व्यवसायी दर्ताको अनुमतिपत्र (लाइसेन्स) परीक्षा सञ्चालन गरेको छ।
पोखराको लामाचौरस्थित इन्जिनियरिङ अध्ययन संस्थान पश्चिमाञ्चल क्याम्पसमा शुक्रबार र शनिबार इन्जिनियरिङ विधामा स्नातक तह उत्तीर्ण भएका इन्जिनियरका लागि लाइसेन्स परीक्षा लिइएको हो।
विसं २०७९ मा परिषद्ले पहिलोपटक परीक्षा सुरु गरेकामा सङ्घीयताको मर्मअनुसार परीक्षालाई राजधानीबाहिर विकेन्द्रित गरिएको नेपाल इन्जिनियरिङ काउन्सिलका रजिस्ट्रार तथा सदस्यसचिव शिवमङ्गल गिरीले बताए। उनका अनुसार इन्जिनियर उत्तीर्ण भएका इन्जिनियरहरूले इन्जिनियरिङ व्यवसाय गर्न लाइसेन्स परीक्षा पास भएर काउन्सिलमा दर्ता हुनुपर्ने व्यवस्था छ।
काउन्सिलको परीक्षा राजधानीबाहिर समेत सञ्चालन भएपछि विद्यार्थीलाई सजिलो भएको छ। यसबाट परीक्षाका लागि भनेर काठमाडौँ जानुपर्ने झन्झट र बाध्यता हटेको उनको भनाइ छ।
पश्चिमाञ्चल क्याम्पसमा परीक्षाका लागि दुई सय ६७ विद्यार्थीले आवेदन दिएकामा दुई ५७ सहभागी भएका काउन्सिलका रजिस्ट्रार गिरीले जानकारी दिए। उनका अनुसार सहभागीमध्ये एक सय ४७ जना उत्तीर्ण भएका छन्।
काउन्सिल ऐन जारी भएपछि विसं २०७९ देखि परीक्षा लिन सुरु गरिएको थियो। परिषद्ले हालसम्म सातपटक परीक्षा लिइसकेको छ। काउन्सिलले कम्प्युटरमा आधारित भएर परीक्षा सञ्चालन गर्दै आएको छ।
“अहिले आठौँ पटक पोखराबाट परीक्षा सुरुआत गरेका छौँ, यसबाट प्रदेशबाट आउने र बाहिरबाट आउने परीक्षार्थीलाई काठमाडौँ जानुपर्ने बाध्यता हटेको छ। विद्यार्थीलाई सहज होस् भनेर उपत्यकाबाहिरबाट सुरुआत गरेका हौँ। यसबाट अन्य प्रदेशमा जान हामीलाई बाटो खुलेको छ”, गिरीले भने। पोखरामा कुनै समस्याविना परीक्षा सञ्चालन भएको उनले बताए।
काउन्सिलले तीन महिनाको अन्तरमा वर्षमा चारपटक परीक्षा सञ्चालन गर्दै आएको छ। पश्चिमाञ्चल क्याम्पसका प्रमुख निर्मलप्रसाद बरालले प्रविधिलाई प्रोत्साहन गर्दै परीक्षा सञ्चालन गर्न सफल भएको बताए। उनले यस परीक्षापछि क्याम्पस र कर्मचारीको आत्मसम्मान अझ बढेको उल्लेख गरे।
बरालले भने, “इन्जिनियरिङ काउन्सिलले नीतिगत हिसाबले सबै परीक्षालाई विकेन्द्रित गर्दै आएको छ । नेपालमा मात्र होइन विदेशका विश्वविद्यालयबाट अध्ययन पूरा गरेका विद्यार्थीले पनि यो परीक्षा दिन सक्छन् । हामीले सोही अनुसार पूर्वाधार तयार गर्दै लगेका छौँ।” क्याम्पसको पूर्वाधारका हिसाबले एक सत्रमा ८० जनालाई परीक्षामा सहभागी गराउन सकिएको उनले जानकारी दिए।
परिषद्का बोर्ड सदस्य राममणि अधिकारीले काउन्सिल ऐनमा व्यवस्था भएअनुसार विकेन्द्रित प्रावधानलाई आत्मसात् गर्दै परिषद् अघि बढेको भन्दै पश्चिमाञ्चल क्याम्पसको प्रविधिले परीक्षालाई सहज बनाएको बताए।
परीक्षार्थी सङ्गीता रिजालले पोखरामा परीक्षा दिन पाउँदा सजिलो भएको बताइन्। समय र खर्च दुवै बचत भएको भनाइ उनको छ। इन्जिनियरका रूपमा काम गर्न इन्जिनियरिङ काउन्सिलले लिएको परीक्षामा उत्तीर्ण हुनुपर्दछ।
परीक्षामा उत्तीर्ण नहुनेले काउन्सिलको प्रमाणपत्र नपाउने भएकाले इन्जिनियरका रूपमा काम गर्न नपाउने व्यवस्था ऐनमा गरिएको छ।
