चिनियाँ नयाँ वर्षको उपलक्ष्यमा दरबार हाई स्कुलका विद्यार्थीलाई शैक्षिक सामग्री प्रदान
काठमाडौं । चीन सरकारले काठमाडौंको दरबार हाई स्कुललाई शैक्षिक सामग्री सहयोग उपलब्ध गराएको छ । चिनियाँ नयाँ वर्षको उपलक्षमा चीन सरकार र चिनियाँ जनताको तर्फबाट विद्यालयलाई स्टेसनरी, खेलकुद, स्वास्थ्य सामग्री र पोशाक सहयोग गरेको हो । शुक्रबार विद्यालयमा कार्यक्रम गरी नेपालका लागि चिनियाँ राजदूत होउ यान्छीले शैक्षिक सामग्री हस्तान्तरण गरिन् ।
कार्यक्रममा शिक्षा, विज्ञान तथा प्रविधि मन्त्री कृष्णगोपाल श्रेष्ठले चीन सरकारको सहयोग निरन्तर प्राप्त भइरहेको भन्दै मन्त्री श्रेष्ठले राजदूत यान्छीलाई धन्यवाद दिए । राजदूत यान्छीले विद्यार्थीलाई शैक्षिक सामग्री वितरण गर्न पाउँदा आफूलाई खुसी लागेको बताइन् ।
२०७२ सालको भूकम्पबाट दरबार हाइस्कुल पूर्ण रुपमा क्षति भएपछि चीन सरकार आफैंले विद्यालय भवन निर्माण गरेको थियो । पुनर्निमाणपछि विद्यालयमा पठनपाठन शुरु भइसकेको छ ।
