एसईईको नतिजा प्रकाशित गर्ने राष्ट्रिय परीक्षा बोर्डको तयारी

काठमाडौं । राष्ट्रिय परीक्षा बोर्डले एसईईको नतिजा आज प्रकाशित गर्ने भएको छ । बोर्डको आज बसेको बैठकले यस वर्षको एसईई परीक्षाको नतिजा प्रमाणीकरण गर्ने निर्णय गरेको हो । विद्यालयले गरेको आन्तरिक मूल्यांकनका आधारमा बोर्डले प्रमाणीकरण गरेपछि नतिजा सार्वजनिक गर्ने प्रावधान छ ।

बोर्डले गतसाता नै विद्यालयले गरेको आन्तरिक मूल्यांकनका आधारमा नतिजा तयार पारेको थियो । नतिजा प्रकाशित गर्दा विद्यार्थीको चहलपहल बढ्ने र कोरोना संक्रमण झनै फैलन सहयोग पुग्ने भन्दै रोकिएको थियो । गत चैत ६ गतेका लागि निर्धारित एसईई परीक्षा कोरोना संक्रमणका कारण अन्तिम समयमा स्थगित भएको थियो ।

परीक्षा नहुने भएपछि विद्यालयले गरेको आन्तरिक मूल्यांकनको आधारमा नतिजा सार्वजनिक गर्न लागिएको हो । देशभर एसईईका लागि ४ लाख ८२ हजार २१९ विद्यार्थीले फर्म भरेका थिए ।