पूर्वाञ्चल र मध्यपश्चिम विश्वविद्यालयमा उपकुलपति नियुक्त
काठमाडौँ । मध्यपश्चिम र पूर्वाञ्चल विश्वविद्यालयले उपकुलपति पाएको छ । प्रधानमन्त्री तथा कुलपति केपी शर्मा ओलीले आइतबार मध्यपश्चिममा प्रा.डा. नन्दबहादुर सिंह र पूर्वाञ्चल विश्वविद्यालयमा प्रा.डा. यादवराज कोइरालालाई उपकुलपति नियुक्ति गर्नुभएको प्रधानमन्त्रीका प्रेस सल्लाहकार सुर्य थापाले जानकारी दिए ।
उनीहरू त्रिभुवन विश्वविद्यालयका प्राध्यापक हुन् । मध्यपश्चिम र पूर्वाञ्चल सहित ६ विश्वविद्यालय करिब ६ महिनादेखि उपकुलपति लगायत पदाधिकारी विहीन छन् । उनीहरू दुवै सत्तारुढ नेकपा निकट हुन् ।
सुदूरपश्चिम, संस्कृत, पोखरा र कृषि तथा वन विज्ञान विश्वविद्यालय पनि उपकुलपति लगायत पदाधिकारी विहीन छन् । लामो समय पदाधिकारी नहुँदा प्राज्ञिक परिषद् र नतिजा प्रकाशन लगायतमा काम रोकिदै आएको छ ।
उपकुलपतिको नाम सिफारिस समितिले नाम सिफारिस गरेपछि कुलपति ओलीले नियुक्तिका निर्णय गरेका हुन् । शिक्षामन्त्री गिरिराजमणि पोखरेलको अध्यक्षतामा पूर्वाञ्चल विश्वविद्यालयको उपकुलपति सिफारिस समिति र मध्यपश्चिम विश्वविद्यालयमा राष्ट्रिय योजना आयोगका शिक्षा हेर्ने सदस्य उषा झाको अध्यक्षतामा सिफारिस समिति बनेको थियो ।
