काठमाडौं । नेपाली कांग्रेसका नेता सन्तोष चालिसेविरुद्ध भ्रष्टाचार मुद्दा दायर भएको छ । अख्तियार दुरुपयोग अनुसन्धान आयोगले आइतबार चालिसेविरुद्ध भ्रष्टाचार र गैरकानुनी सम्पत्ति आर्जनको अभियोगमा विशेष अदालतमा मुद्दा दर्ता गरेको हो ।
अख्तियारले चालिसेले ३ करोड ६८ लाख ४७ हजार ४ सय ६१ रुपैयाँ गैरकानुनी रूपमा आर्जन गरेको अभियोग लगाएको छ ।
अख्तियारले चालिसेकी श्रीमती मन्दिरा चालिसे, छोरा सागर चालिसे, सञ्जीव चालिसे र बुहारी प्रमिला पोखरेललाई पनि गैरकानूनी सम्पत्तिबाट खरिद तथा लगानी गरिएका सम्पत्ति जफत गर्ने प्रयोजनका लागि प्रतिवादी बनाएको छ ।
त्यसैगरी, चालिसेले आर्थिक वर्ष २०७७/७८ को सम्पत्ति विवरण पेस नगरेको पाइएकाले भ्रष्टाचार निवारण ऐन अनुसार जरिवाना असुल गर्न गोकर्णेश्वर नगरपालिकालाई पत्राचार गरिने अख्तियारले जनाएको छ।
चालिसे २०७४ देखि २०७९ सम्म काठमाडौंको गोकर्णेश्वर नगरपालिकाका मेयर थिए । २०७९ को निर्वाचनमा उनी काठमाडौं ३ बाट सांसद निर्वाचित भएका हुन् ।
प्रतिक्रिया