रवि लामिछानेविरुद्ध पर्सामा पनि पक्राउ पुर्जी जारी
वीरगंज । राष्ट्रिय स्वतन्त्र पार्टीका सभापति रवि लामिछानेविरुद्ध पर्सामा पनि पक्राउ पुर्जी जारी भएको छ । वीरगंजको सानो पाइला सहकारीको बचत अपचलनको विषयमा अनुसन्धान गर्न जिल्ला अदालत पर्साले बुधबार लामिछाने र गोरखा मिडियाका तत्कालीन संचालक छविलाल जोशीविरुद्ध पक्राउ पुर्जी जारी गरेको प्रहरीले जनाएको छ ।
प्रहरी उनीहरुविरुद्ध पक्राउ पुर्जी जारी गर्न अनुमतिका लागि अदालत गएको थियो । उक्त सहकारीबाट करिब ८ करोड रुपैयाँ गोर्खा मिडियामा गएको बताइएको छ ।
लामिछाने र जोशीविरुद्ध कास्की, रुपन्देही, काठमाडौं र चितवनबाट पक्राउ पुर्जी जारी भइ अनुसन्धान जारी छ । केही दिनअघि बयानका लागि लामिछानेलाई कास्कीबाट काठमाडौं ल्याइएको थियो । काठमाडौंमा तीन दिनमा बयान सकिएको थियो । त्यसपछि अहिले चितवनमा उनको बयान चलिरहेको छ ।
