कृषि विकास बैंक ह्याकिङमा संलग्न थप एक जना पक्राउ
काठमाडौं । कृषि विकास बैंक ह्याकिङ प्रकरणका एक सदस्य पक्राउ परेका छन् । महानगरीय अपराध महाशाखाका अनुसार मोरङका दीपक नेपाल पक्राउ परेका हुन् ।
नेपालको टोलीले नाइजेरियन र भारतीय नागरिकहरुसँग लामो समयदेखि भारतको मुम्बई साथै नेपालमा बसी नेपालका बैंक तथा वित्तीय संस्थाहरूबाट पाँच अर्बभन्दा बढी रकम ह्याक गरी लैजाने योजना बनाएको महाशाखा प्रमुख सहकुल थापाले जानकारी दिए ।
यसअघि उनीजस्तै १८ जना एजेन्ट पक्राउ परिसकेका छन् । गत असोज ५ गते सिरहा शाखाको उक्त पैसा सिस्टम ह्याक गरेर बैंकको केन्द्रीय कार्यालय पुर्याइएको थियो । पछि उक्त रकम बैंकबाट विभिन्न व्यक्तिले निकालेका थिए।
यसका मुख्य योजनाकार अफ्रिकन मूलका नागरिक पिटर रहेको प्रहरीले बताउँदै आएको छ । पक्राउ परेका नेपाललाई आवश्यक कारबाहीको लागि महानगरीय प्रहरी परिसरको जिम्मा लगाइएको महाशाखाले जनाएको छ ।
