मिर्गौला किनबेचमा संलग्न भएको आरोपमा निदान अस्पतालका सिइओसहित पाँच जना पक्राउ
काठमाडौं । मिर्गौला किनबेचमा संलग्न भएको आरोपमा प्रहरीले ललितपुरको निदान अस्पतालका सिइओसहित पाँच जनालाई पक्राउ गरेको छ ।
पक्राउ पर्नेमा अस्पतालका सिइओ विपेन्द्र प्रधान, डा. राजेश पन्त, रामेछाप दोरम्बाका शंकरलाल लामा, सप्तरीका कुमुदकुमार भट्टराई र ललितपुरका रामचन्द्र आले छन् ।
बुधबार पत्रकार सम्मेलन गरी मानव बेचविखन ब्युरोले घटनाबारे जानकारी गराएको हो । भट्टराई निदान अस्पतालका कानुनी सल्लाहकार र आले जिल्ला प्रशासन कार्यालय ललितपुरका शाखा अधिकृत हुन् ।
उनीहरूको मिलेमतोमा एक बिरामीको शंकरलाल लामालाई मिर्गौला विक्री गरिएको प्रहरीको मानव बेचबिखन तथा ओसारपसार ब्युरोले जनाएको छ । ब्युरोका प्रहरी उपरीक्षक गोविन्द थपलियाका अनुसार नक्कली व्यक्ति खडा गरी मिर्गौला लामालाई प्रत्यारोपण गराइएको थियो ।
