बुद्ध एयरको काउन्टर तोडफोड गर्ने सांसद प्रमोद साह पक्राउ
काठमाडौं । जहाज ढिलो आएको भन्दै जनकपुर विमानस्थलको बुद्ध एयरको काउन्टर तोडफोड गर्ने सांसद प्रमोदकुमार साह पक्राउ परेका छन् । साहलाई महानगरीय अपराध महाशाखाको टोलीले त्रिभुवन अन्तर्राष्ट्रिय विमास्थलबाट पक्राउ गरेको हो ।
जिल्ला अदालत धनुषाबाट पक्राउ पूर्जी जारी भएपछि प्रहरी टोलीले उनलाई पक्राउ गरएको अपराध महाशाखाका प्रमुख एसएसपी सहकुल थापाले जानकारी दिए ।
जनकपुर विमानस्थलस्थित बुद्ध एयरको काउन्टर तोडफोड गर्दै कर्मचारीमाथि अभद्र व्यवहार गर्ने सांसदविरूद्ध जनकपुर जिल्ला अदालतले पक्राउ पूर्जी जारी गरेको थियो ।
नेपाल नागरिक उड्डयन प्राधिकरणको जाहेरीमा जिल्ला प्रहरी कार्यालय धनुषाको अनुरोधपछि अदालतले प्रतिनिधि सभाका सांसद साहविरूद्ध मंगलबार पक्राउ पूर्जी जारी गरेको थियो ।
बुद्ध एयरको चेक काउन्टरमा तोडफोड गरेपछि साहमाथि कारवाही नभए जनकपुरमा जहाज नउडाउने चेतावनी वायुसेवा संचालक संघले सोमबार दिएको थियो ।
