मान्छेको स्वार्थीपन शान्त होस् !

मान्छेले आफु सुखी र खुसी हुनको लागि जसरी सृष्टिका अन्य जीव तथा वनस्पतिहरूको हुर्मत लिंदैछ, प्रकृतिलाई सहिनसक्नु भएको छ |

अर्काको विनाश गरेर दंभ गर्ने हामी मानिस आफ्नो विनाश उपस्थित हुँदा कतिविध्न डराउँदो रहेछ – करोना एसको उदाहरण बनेको छ |

विकासका लागि प्रतिस्पर्धा गर, प्रतिस्पर्धामा तिमीले जित्नै पर्छ र जित्नेहरू नै सफल व्यक्ति हुन्छन् – जस्तो द्वन्द निम्त्याउने शिक्षाले विकृत भएको मान्छेको बुद्धिले पर्यावरण र प्रकृतिको रक्षाको कुरा बुझ्नै सक्दैन |

कोविड-१९ संग डराएको मान्छे अझैं पनि लोभीपापीपनको नर्कबाट माथि उठेको छैन | तेसैले रोग र रोगले निम्त्याएको विपत्तिलाई समेत डलरमा तौलने प्रयत्न गर्दैछ |

मानौं – मर्दा पनि डलर नै लिएर जाने छ !

जतिसुकै अप्रिय लागे पनि ७ दिनको लकडाउनका कारण काठमाडौँ उपत्यका प्रकृतिमा आश्रित सबैले धक मारेर लामो सास तान्ने लायक भएको छ |

करोना-१९ ले मान्छेको डरलाई उजागर गरेको छ | मान्छेलाई चाहिने स्वच्छ वातावारणतिर फर्कने प्रेरणा दिएको छ |

“आकाश शान्त होस्, अन्तरीक्ष शान्त हो, पृथ्वी शान्त होउन्, पानी शान्त होस्, औषधिहरू शान्त होउन्, विश्व-ब्रह्माण्ड शान्त होस्, प्राकृतिक विश्वको हरेक वस्तु पुन: आफ्नो प्रकृतिमा फर्कोस् र शान्त होस् |”

स्वार्थी मान्छेको स्वार्थीपन शान्त होस् |

सबैको कल्याण होस् |