‘जनतासँग संसद्मा पठाऊ भनेर भोट माग्ने अनि संसद्तिर मुख नफर्काउने भन्ने हुन्छ ?’
एक पटक मदन भण्डारीलाई ‘तपाईंहरु त संसद्मुखी हुनुभयो नि ?’ भनेर सोधिँदा उहाँले उत्तर दिनुभएको थियो, ‘हो, हाम्रो मुख संसद्तिरै फर्किएको छ । जनतासँग संसद्मा पठाऊ भनेर भोट माग्ने अनि संसद्तिर मुख नफर्काउने भन्ने हुन्छ ?’
मदन भण्डारीको यही हिम्मत, दूरदर्शिता र दृष्टिकोणले रक्षात्मक अवस्थामा रहेको कम्युनिस्ट आन्दोलनलाई नेपालमा लोकप्रिय बनाएको थियो । जननेता भण्डारीले साहसका साथ अघि सारेका प्रस्थापनाभन्दा नेपालको कम्युनिस्ट आन्दोलन अन्त जान सक्दैन भन्ने पुष्टि पार्टी एकताबाट पनि छ ।
जनताको बहुदलीय जनवादका नाममा मदनले सूत्रीकरण गरेका विशेषताहरु नै आजको कम्युनिस्ट पार्टी र आन्दोलनको मूल बाटो हो । जनताका बीचमा जाने, विश्वास प्राप्त गर्ने र आमूल परिवर्तनका लागि सरकारमा गएर काम गर्ने कुरामा हामी जति खरो उत्रिन सक्छौँ, त्यति नै मदनप्रति न्याय हुन्छ ।
विष्णु रिजाल ।
