‘बाधक शिवमाया होइनन्, प्रचण्ड हुन्’
नारायण गाउँले ।
धेरै माओवादी मित्रहरू उपसभामुखको जोशप्रति आक्रामक देखिनुभएको छ । खासमा शीतल निवासदेखि बालुवाटारसम्मको मलमा हर्लक्क फुलेको त्यो जोशिलो फूल कुनै बाधक होइन ।
खोइ त सभामुखको उम्मेदवार छान्न सकेको ? चार महिना हुन लाग्यो, सभामुख जस्तो पद रिक्त भएको, अझै बाँडफाँड़ र लेनदेन मिलेको छैन । उपसभामुख पनि हावामैं खालि गराउने ? अनि दुबै पद अर्को चार महिना खालि राख्ने ? चार महिनामा मिलाउन नसकिएको हिसाब के उपसभामुखकै कारण बिग्रिएको हो र ?
बाधक शिवमाया होइनन्, प्रचण्ड हुन् । प्रचण्डले सभामुखमा माओवादी दाबी छोड्नेबित्तिकै यो प्रकरणमा पूर्णविराम लाग्छ । पार्टी एकीकरणका नाममा सबै शीर्ष पदमा हात धुनुपर्दा र कार्यालय सहयोगीको भूमिकामा खुम्चिनुपर्दा प्रचण्डलाई पनि गाह्रो छ र ओलीजीलाई पनि फेरि एमसिसि सदनमा छिर्नै नदिने सभामुख बनाउन सजिलो छैन । आम जनतालाई पचासको ठाउँमा पाँच सय अर्ब आउने पक्का भयो भनेर झुटो गफ गरेको कुरो, सदनसम्मैं नपुगी तुहिन दिनु पनि भएन ।
हलो आफै अट्काएर दोष जति शिवमायालाई ? बरू ओलीले त कम्तिमा ‘साहसी र क्रान्तिकारी’ छवि बनाइदिएका छन्, प्रचण्डले त दोषमात्रै ?
