पर्वतमा ‘रूपान्तरण र पुस्तान्तरणको यात्रामा युवाको भूमिका’ विषयक विचार गोष्ठी हुँदै

पर्वत। नेपाली कांग्रेसमा रूपान्तरण, नेतृत्वमा पुस्तान्तरण र नीति तथा संगठन निर्माणमा युवाको अर्थपूर्ण सहभागिताबारे बहस गर्ने उद्देश्यले पर्वतमा ‘रूपान्तरण र पुस्तान्तरणको यात्रामा युवाको भूमिका’ विषयक विचार गोष्ठी तथा अन्तरक्रिया कार्यक्रम आयोजना हुने भएको छ।

असोज १२ गते बिहान ११ बजे पर्वतको न्यु फ्रेन्डली होटलमा आयोजना हुने कार्यक्रममा नेपाली कांग्रेसका क्षेत्रीय प्रतिनिधि तथा युवाहरूको सहभागिता रहने कार्यक्रमका संयोजक इन्जिनियर शेखरनाथ चापागाईंले जानकारी दिएका छन्।

कार्यक्रममा बदलिँदो राजनीतिक तथा सामाजिक परिवेशमा नेपाली कांग्रेसको भावी दिशा, संगठन सुदृढीकरण, नेतृत्वमा पुस्तान्तरण, युवा नेतृत्वको विकास, नीति निर्माणमा नयाँ पुस्ताको भूमिका तथा पार्टीभित्र युवाको सार्थक सहभागितालगायत विषयमा खुला विचार–विमर्श गरिने बताइएको छ।

राजनीतिमा नयाँ पुस्ताको सहभागिता केवल उमेरका आधारमा नेतृत्व परिवर्तनमा सीमित नभई नयाँ सोच, कार्यशैली, जिम्मेवारी र नतिजामुखी भूमिकासँग जोडिनुपर्ने मान्यतासहित कार्यक्रम आयोजना गर्न लागिएको संयोजक चापागाईंले बताएका छन्। गोष्ठीलाई पार्टीका विभिन्न तहमा क्रियाशील युवा तथा क्षेत्रीय प्रतिनिधिबीच अनुभव, विचार र भावी कार्यदिशाबारे संवाद गर्ने साझा मञ्चका रूपमा विकास गर्ने उद्देश्य राखिएको छ।

पछिल्लो समय राजनीतिक दलभित्र पुस्तान्तरण, नेतृत्व विकास र निर्णय प्रक्रियामा युवाको सहभागिताबारे बहस भइरहेका बेला पर्वतमा हुन लागेको यो कार्यक्रमले स्थानीय तहबाटै रूपान्तरण र पुस्तान्तरणका विषयमा विचार–मन्थन गर्ने अवसर प्रदान गर्ने आयोजकको अपेक्षा छ।

कार्यक्रमका संयोजक चापागाईं सिभिल इन्जिनियर हुन्। उनी सेन्टर फर डेमोक्रेटिक इन्जिनियर्स नेपाल (सिडेन) को सातौँ केन्द्रीय कार्यकारिणी समितिका सदस्यसमेत रहिसकेका छन्। सिडेनको आधिकारिक अभिलेखमा चापागाईं सातौँ कार्यकारिणी समितिको सदस्य रहेको उल्लेख छ। 

कार्यक्रममा सहभागी भई रूपान्तरण, पुस्तान्तरण र राजनीतिमा युवाको भूमिकाबारे आफ्ना विचार, अनुभव र दृष्टिकोण साझा गर्न नेपाली कांग्रेसका क्षेत्रीय प्रतिनिधि तथा युवाहरूलाई आग्रह गरिएको छ।