त्रिवि परिसरमा दलहरुका घोषणापत्रमाथि गहन बहस

काठमाडौं। नेपाल प्रथम राष्ट्रिय अभियानको आयोजनामा सञ्चालन गरिएको ’निर्वाचन, जनता र राष्ट्रका लागि’ कार्यक्रमको श्रृंखलाअन्तर्गत शनिबार त्रिभुवन विश्वविद्यालय परिसरमा सबै प्रमुख राजनीतिक दलका घोषणापत्रमाथि गहन विमर्श तथा परिचर्चा कार्यक्रम सम्पन्न भएको छ । निर्वाचनको पूर्वसन्ध्यामा आयोजित उक्त कार्यक्रमले चुनावलाई केवल प्रतिनिधि चयनको प्रक्रियामा सीमित नगरी नीतिगत बहस र राष्ट्रनिर्माणको मार्गदर्शनसँग जोड्ने प्रयास गरेको आयोजकले जनाएको छ ।

कार्यक्रममा राष्ट्रिय योजना आयोगका निवर्तमान उपाध्यक्ष प्रा. डा. शिवराज अधिकारी, शिक्षाविद् प्रा. डा. विद्यानाथ कोइराला, इतिहासविद् प्रा. डा. वद्री गौतम तथा ’नेपाल प्रथम अभियान’का राष्ट्रिय संयोजक नारायण प्रसाद ढकालले विभिन्न राजनीतिक दलका घोषणापत्रको विषयवस्तु, दृष्टिकोण र राष्ट्रहितसँगको सम्बन्धबारे सूक्ष्म विश्लेषण प्रस्तुत गरे । उनीहरूले घोषणापत्रलाई केवल चुनावी कागजात नभई आगामी शासन–दिशा निर्धारण गर्ने सार्वजनिक प्रतिबद्धताको दस्तावेजका रूपमा व्याख्या गरेका थिए ।

वक्ताहरूले आर्थिक रूपान्तरण, सुशासन, शिक्षा, स्वास्थ्य, पूर्वाधार विकास, कृषि, ऊर्जा तथा सांस्कृतिक संरक्षणजस्ता विषयमा दलहरूले प्रस्तुत गरेका कार्यक्रमहरूको तुलनात्मक अध्ययन आवश्यक रहेको धारणा राखेका थिए । घोषणापत्रमा उल्लिखित प्रतिबद्धता व्यवहारमा कसरी कार्यान्वयन हुन्छ भन्ने प्रश्न नै निर्वाचनपछिको मूल परीक्षण हुने भनाइ थियो ।

परिचर्चामा सहभागीहरूले लोकतान्त्रिक मूल्य–मान्यता, संवैधानिक दायित्व र सांस्कृतिक राष्ट्रभावप्रतिको प्रतिबद्धता व्यवहारमा देखिनुपर्नेमा जोड दिएका थिए । विश्वविद्यालय परिसरजस्तो बौद्धिक वातावरणमा भएको यस्तो बहसले नागरिकस्तरमा नीति–चिन्तन र वैचारिक संवादको संस्कार विकास गर्न सहयोग पुग्ने विश्वास व्यक्त गरिएको छ ।

कार्यक्रममा विद्यार्थी, प्राध्यापक, अनुसन्धानकर्ता तथा नागरिक समाजका प्रतिनिधिहरूको सक्रिय सहभागिता रहेको थियो । खुला प्रश्नोत्तर सत्रमा सहभागीहरूले घोषणापत्रका प्राथमिकता, स्रोत सुनिश्चितता, कार्यान्वयन संयन्त्र र दीर्घकालीन प्रभावबारे जिज्ञासा राखेका थिए । वक्ताहरूले तर्कपूर्ण बहस र तथ्यमा आधारित विश्लेषणमार्फत लोकतन्त्र सुदृढ हुने धारणा व्यक्त गरेका थिए ।

आयोजकका अनुसार ’नेपाल प्रथम राष्ट्रिय अभियान’ले आगामी दिनहरूमा पनि यस्तै विषयगत बहस र नागरिक संवाद कार्यक्रमलाई निरन्तरता दिनेछ । कार्यक्रमलाई सफल बनाउन योगदान पुर्याउने सम्पूर्ण विशिष्ट अतिथि, सहभागी, सहयोगी तथा आयोजक टोलीप्रति आयोजकले हार्दिक आभार व्यक्त गरेको छ ।

निर्वाचनलाई केवल शक्ति प्राप्तिको प्रतिस्पर्धा नभई राष्ट्रनिर्माणको मार्गनिर्देशक प्रक्रियाका रूपमा हेर्नुपर्ने सन्देशसहित सम्पन्न उक्त कार्यक्रमलाई जिम्मेवार नागरिक बहसको सकारात्मक उदाहरणका रूपमा लिइएको छ ।