चाँडै भेनेजुएला फर्कने विपक्षी नेतृ मचाडोको वाचा

वासिङटन । भेनेजुएलाकी विपक्षी नेतृ मारिया कोरिना मचाडोले आफू ‘सकेसम्म चाँडो’ देश फर्कने योजना बनाइरहेको बताएकी छन् । उनले काराकसमा निकोलस मदुरोलाई प्रतिस्थापन गर्ने अन्तरिम राष्ट्रपतिको अधिकार अस्वीकार गरिन् ।

नोबेल शान्ति पुरस्कार विजेता मचाडोले अमेरिकी प्रसारणकर्ता फक्स न्युजसँग कुरा गर्दै अमेरिकाले शनिबार मदुरोलाई जबरजस्ती सत्ता हटाएको घटनापछि सामाजिक सञ्जाल बाहेक पहिलो सार्वजनिक टिप्पणी गरेकी हुन् । मचाडोले रोड्रिगेजलाई खुल्ला अस्वीकार गर्दै उनलाई ‘यातना, उत्पीडन, भ्रष्टाचार र लागुपदार्थ ओसारपसारको मुख्य वास्तुकार’ भनेकी छन् ।

उनका अनुसार भेनेजुएलाको जनताले रोड्रिगेजलाई अस्वीकार गरेका छन् र विपक्षीको पक्षमा मत दिने सुनिश्चित छ । मचाडोले स्वतन्त्र र निष्पक्ष चुनावमा ९० प्रतिशतभन्दा बढी मतले जित्ने विश्वास व्यक्त गरिन् ।
उनले अमेरिकी सहयोगमा देशको आपराधिक संरचना ध्वस्त पार्ने, लाखौँ आप्रवासी नागरिकलाई घर फिर्ता ल्याउने र भेनेजुएलालाई ऊर्जा केन्द्रमा परिणत गर्ने वाचा पनि गरेकी छन् ।

तर अमेरिकी राष्ट्रपति डोनाल्ड ट्रम्पले मचाडोको सत्तामा आउने सम्भावना कम महत्त्व दिएको र रोड्रिगेज तथा मदुरोको बाँकी टोलीसँग तेल आपूर्ति स्वीकार गर्ने सर्तमा मात्र काम गर्न चाहेको बताए ।

मचाडोले ट्रम्पलाई नोबेल पुरस्कार दिने प्रस्ताव उल्लेख गर्दै भेनेजुएलाका जनताको प्रतिनिधि रूपमा सम्मान दिन चाहेको पनि बताइन् । उनले अक्टोबर १० पछि ट्रम्पसँग कुनै कुरा नगरेको स्पष्ट पारिन् ।