मेलबर्न । सात पटककी ग्रान्डस्लाम एकल च्याम्पियन अमेरिकी टेनिस स्टार भेनस विलियम्सलाई ४५ वर्षको उमेरमा अस्ट्रेलियन ओपनका लागि वाइल्डकार्ड प्रदान गरिएको छ। यससँगै उनी सिजनको उद्घाटन ग्रान्डस्लाम अस्ट्रेलियन ओपन खेल्ने सबैभन्दा बढी उमेरकी महिला खेलाडी बनेकी छन्।
हालका वर्षमा सीमित सङ्ख्यामा मात्र एकल खेल खेलेकी भेनस विलियम्सले सन् २०२१ पछि पहिलो पटक मेलबर्न पार्कमा आयोजना हुने मुख्य ड्रमा प्रतिस्पर्धा गर्नेछिन्। लामो समयपछि पुनः ग्रान्डस्लाम कोर्टमा फर्किन पाउँदा आफू निकै उत्साहित रहेको उनले बताइन्।
“म फेरि अस्ट्रेलिया फर्किन पाउँदा अत्यन्तै खुसी छु र अस्ट्रेलियाको गर्मीमा प्रतिस्पर्धा गर्न आतुर छु”, उनले भनिन्, “त्यहाँ मेरा धेरै अविश्वसनीय सम्झनाहरू छन् र मेरो करियरका लागि निकै अर्थ राख्ने स्थानमा फेरि खेल्ने अवसर पाएकोमा म आभारी छु।”
भेनस विलियम्स पाँच पटककी विम्बल्डन च्याम्पियन तथा दुई पटककी युएस ओपन विजेता हुनुहुन्छ। अस्ट्रेलियन ओपनमा उनी सन् २००३ र २०१७ मा एकल फाइनलसम्म पुग्नुभएको थियो, यद्यपि उपाधि जित्न भने सकेकी थिइनन्।
उनी सन् २०१५ मा पहिलो चरणमै बाहिरिएपछि ४४ वर्षको उमेरमा प्रतिस्पर्धा गरेकी जापानकी किमिको डेटपछि अस्ट्रेलियन ओपन खेल्ने सबैभन्दा बढी उमेरकी महिला खेलाडी बन्नुहुनेछ। यो उपलब्धिले भेनसको लामो र प्रेरणादायी करियरलाई अझ ऐतिहासिक बनाएको छ।
चार पटककी अस्ट्रेलियन ओपन डबल्स च्याम्पियन भेनस विलियम्सले १६ महिनाको विश्रामपछि गत वर्ष युएस ओपनमार्फत प्रतिस्पर्धात्मक टेनिसमा पुनरागमन गरेकी थिइन्। उनले आगामी जनवरी १८ देखि फेब्रुअरी १ सम्म हुने अकल्यान्ड क्लासिकमार्फत अस्ट्रेलियन ओपनको तयारी सुरु गर्नेछिन्। त्यसपछि उनी मेलबर्न जानुअघि होबार्ट इन्टरनेसनल प्रतियोगितामा पनि सहभागिता जनाउने कार्यक्रम छ।
यसैबीच, दुई पटककी ग्रान्डस्लाम विजेता तथा साथी अमेरिकी खेलाडी कोको गाउफले भेनस विलियम्स अझै पनि शीर्षस्तरीय प्रतियोगितामा प्रतिस्पर्धा गर्न आउनु ‘अविश्वसनीय’ रहेको प्रतिक्रिया दिएकी छन्। “उहाँ टेनिस खेलकी एक साँचो किंवदन्ती हुनुहुन्छ”, गाउफले भनिन्, “उहाँलाई फेरि कोर्टमा देख्न पाउनु अत्यन्तै राम्रो कुरा हो। उहाँको करियरको दीर्घायु साँच्चै प्रेरणादायी छ र म उहाँलाई पुनः खेलेको हेर्न आतुर छु।”
प्रतिक्रिया