खालिदा जियाको निधनमा शेख हसिनाद्वारा शोक व्यक्त

ढाका। बङ्गलादेश अवामी लिगकी अध्यक्ष तथा पूर्वप्रधानमन्त्री शेख हसिनाले मङ्गलबार बङ्गलादेशकी पूर्वप्रधानमन्त्री एवं बङ्गलादेश नेसनालिस्ट पार्टी (बिएनपी) की अध्यक्ष बेगम खालिदा जियाको निधनप्रति गहिरो शोक व्यक्त गरेकी छिन् ।

अवामी लिगको आधिकारिक पोस्टमार्फत जारी गरिएको शोक सन्देशमा शेख हसिनाले भनेकी छिन्, “म बिएनपीकी अध्यक्ष तथा पूर्वप्रधानमन्त्री बेगम खालिदा जियाको निधनमा गहिरो समवेदना प्रकट गर्दछु । बङ्गलादेशको पहिलो महिला प्रधानमन्त्रीका रूपमा तथा लोकतन्त्र स्थापनाको सङ्घर्षमा उहाँले निर्वाह गर्नुभएको भूमिकाका कारण राष्ट्रका लागि उहाँको योगदान महत्त्वपूर्ण थियो र सधैँ स्मरण गरिनेछ । उहाँको निधनले बङ्गलादेशको राजनीतिक जीवन र बङ्गलादेश नेसनालिस्ट पार्टीको नेतृत्वमा गहिरो क्षति पुगेको छ ।”

शेख हसिनाले दिवङ्गत नेत्रीको आत्माको चिरस्थायी शान्ति र क्षमाका लागि प्रार्थना गर्दै उहाँका छोरा तारिक रहमान, शोकाकुल परिवारका सदस्यहरू तथा सम्पूर्ण बिएनपी परिवारप्रति हार्दिक समवेदना व्यक्त गरेकी छिन् । साथै, उनले सर्वशक्तिमान अल्लाहसँग यस कठिन समयमा परिवारजन र समर्थकहरूलाई धैर्य, शक्ति र सान्त्वना प्रदान गरिदिन प्रार्थना गरेकी छिन् ।

बेगम खालिदा जियाको आज बिहान ८० वर्षको उमेरमा राजधानी ढाकास्थित एभरकेयर अस्पतालमा उपचारका क्रममा निधन भएको हो । बिएनपीले फेसबुकमार्फत जारी गरेको विज्ञप्तिअनुसार, उनको फजरको प्रार्थनाको केही समयपछि बिहान ठीक ६ बजे (स्थानीय समय) निधन भएको पुष्टि गरिएको छ । पार्टीले विज्ञप्तिमा उनको आत्माको अनन्त शान्तिका लागि प्रार्थना गर्न सबैलाई आग्रह गरेको छ ।

बिएनपीका अनुसार फोक्सोको सङ्क्रमणका कारण नोभेम्बर २३ मा बेगम जियालाई एभरकेयर अस्पतालमा भर्ना गरिएको थियो । उनी लामो समयदेखि हृदय रोग, मधुमेह, गठिया, लिभर सिरोसिस र मिर्गौला सम्बन्धी जटिलतासहित विभिन्न दीर्घरोगबाट पीडित रहँदै आएकी थिइन् । यस महिनाको सुरुतिर उन्नत उपचारका लागि उनलाई लन्डन पठाइएको थियो, तर स्वास्थ्य अवस्था सुधार हुन नसकेपछि पुनः ढाकामै उपचार जारी रह्यो ।

उनका छोरा तथा बिएनपीका कार्यवाहक अध्यक्ष तारिक रहमान स्वर्गीय आमालाई श्रद्धाञ्जलि अर्पण गर्न अस्पताल आइपुगेपछि आज बिहान अस्पताल बाहिर ठूलो सङ्ख्यामा समर्थक र शोकाकुल नागरिकहरू भेला भएका थिए ।

यसैबीच, बङ्गलादेशको अन्तरिम सरकारका प्रमुख सल्लाहकार तथा नोबेल शान्ति पुरस्कार विजेता मुहम्मद युनुसले पनि बेगम खालिदा जियाको निधनमा गहिरो दुःख व्यक्त गरेका छन् । उनले दिवङ्गत नेत्रीलाई राष्ट्रको ‘महान संरक्षक’ तथा बङ्गलादेशको लोकतान्त्रिक इतिहासमा एक अग्लो व्यक्तित्वको रूपमा स्मरण गरेका छन्।

एक्समा पोस्ट गरिएको शोक सन्देशमा युनुसले तीन पटककी पूर्वप्रधानमन्त्रीको निधनले आफू गहिरो शोकग्रस्त भएको उल्लेख गर्दै यसलाई राष्ट्रका लागि अपूरणीय क्षति भएको बताएका छन् । उनले भनेका छन्, “बेगम खालिदा जिया केवल एक राजनीतिक दलकी नेता मात्र होइनस उहाँले बङ्गलादेशको इतिहासको एक महत्त्वपूर्ण अध्यायको प्रतिनिधित्व गर्नुभयो ।” उनको लामो राजनीतिक सङ्घर्ष र नेतृत्वसँग जोडिएका जनभावनाहरू सधैँ सम्मानका साथ स्मरण गरिने युनुसले उल्लेख गरेका छन् ।

भारतका प्रधानमन्त्री नरेन्द्र मोदीले पनि बङ्गलादेशकी पूर्वप्रधानमन्त्रीको निधनमा शोक व्यक्त गरेका छन्छ । सामाजिक सञ्जालमार्फत जारी सन्देशमा प्रधानमन्त्री मोदीले बङ्गलादेशकी पहिलो महिला प्रधानमन्त्रीका रूपमा खालिदा जियाले देशको विकास र भारत–बङ्गलादेश सम्बन्ध सुदृढ गर्न महत्त्वपूर्ण योगदान पुर्‍याएको उल्लेख गरेका छन्।

प्रधानमन्त्री मोदीले सन् २०१५ मा ढाकामा उनीसँग भएको न्यानो भेटको सम्झना गर्दै भनेका छन्, “बङ्गलादेशको पहिलो महिला प्रधानमन्त्रीका रूपमा उहाँको योगदान सधैँ स्मरणीय रहनेछ । उहाँको दर्शन र विरासतले भारत–बङ्गलादेश साझेदारीलाई भविष्यमा पनि मार्गदर्शन गरिरहनेछ ।” साथै, उनले दिवङ्गत नेत्रीको आत्माको शान्तिका लागि प्रार्थना गरेका छन् ।